«بعم LIVE» جوباسىندا بعم مەكتەپكە دەيىنگى جانە ورتا ءبىلىم كوميتەتى ءتوراعاسىنىڭ ورىنباسارى ساپۋرا تولەكوۆا 24 قاڭتاردان كەيىنگى وقۋ فورماتى تۋرالى ءتۇسىندىرىپ بەردى، دەپ حابارلايدى اlmaty-akshamy.kz
كوروناۆيرۋستىق ينفەكسيانىڭ تارالۋىنىڭ الدىن الۋ بويىنشا قۇرىلعان ۆاك-تىڭ شەشىمىنە سايكەس 2022 جىلدىڭ 24 قاڭتارىنان باستاپ وقىتۋ فورماتتارىنا وزگەرىستەر ەنگىزىلدى. بۇعان دەيىنگى شەكتەۋلەر بويىنشا نۇر-سۇلتان، الماتى جانە شىمكەنت قالالارىنداعى مەكتەپتەر تولىعىمەن ونلاين فورماتتا، قالعان وڭىرلەردە بالا سانىنا قاراي (600-گە دەيىن جانە 600-دەن اسا كونتينگەنت) ءارتۇرلى نورمالار قاراستىرىلعان بولاتىن.
ساپۋرا تولەكوۆا ەل مەكتەپتەرى 24 قاڭتاردان باستاپ قانداي وقىتۋ جۇيەسىنە كوشەتىنى تۋرالى ايتىپ بەردى.
بىرىنشىدەن، بالاباقشالار، مەكتەپكە دەيىنگى مەكەمەلەر مەنشىك نىسانىنا قاراماستان شتاتتىق رەجيمدە جۇمىس ىستەيدى. اتا-انانىڭ ءوتىنىشى بويىنشا بالا بالاباقشاعا بارادى، ال بارا المايتىن جاعدايدا مىندەتتى تۇردە تاربيەشىسىنە ەسكەرتىپ وتىرادى. ەكىنشىدەن، مەكتەپتەردە جۇمىس قالاي جۇرگىزىلەدى؟ ەگەر مەكتەپتىڭ جالپى وقۋشىلار سانى 600-گە دەيىن بولسا، وندا مەكتەپ ءداستۇرلى رەجيمدە جۇمىس ىستەيدى. ياعني وقۋشىلار ءبىلىمدى مەكتەپتە سىنىبىندا وتىرىپ الادى. ال مەكتەپ كونتينگەنتى 600-دەن كوپ بولسا، وندا ءبىر اۋىسىمدا مەكتەپتىڭ جوبالىق قۋاتىنىڭ 50%-ىن قامتيتىن سىيىمدىلىقپەن شتاتتىق فورماتتا وقىتۋدى ۇيىمداستىرۋعا بولادى، - دەدى ول.
ونىڭ سوزىنشە، مەكتەپ 1000 بالاعا ارنالعان بولسا، وندا ءبىرىنشى اۋىسىمدا 500 جانە ەكىنشى اۋىسىمدا 500 بالانى قامتۋعا بولادى.
شتاتتىق رەجيم كەزىندە باسىمدىق باستاۋىش سىنىپتارعا (1-4 سىنىپتار) بەرىلەدى. سەبەبى، باستاۋىش سىنىپتىڭ بالالارى جاس ەرەكشەلىكتەرىنە قاراي سيفرلىق رەسۋرستاردى، ونلاين پلاتفورمالاردى قولدانۋدا قيىندىق تۋادى. ەرەسەكتەردىڭ كومەگى قاجەت بولادى. ال اتا-انانىڭ كوبى جۇمىستا بولعاندىقتان، بالالاردا قيىندىق تۋۋى مۇمكىن. سوندىقتان بالالاردىڭ مۇعالىمنەن بەتپە-بەت ساباق العانى ماڭىزدى، - دەپ اتاپ ءوتتى ساپۋرا تولەكوۆا.
ال حالىقارالىق مەكتەپتەردە باسىمدىق 1-6 سىنىپ وقۋشىلارىنا بەرىلەدى.
بعم وكىلى مەكتەپتەگى وقۋشى سانىنا بايلانىستى قاي سىنىپتى شتاتتىق، قاي سىنىپتى قاشىقتان وقىتۋ قاجەتتىگىن مەكتەپ اكىمشىلىگى دەربەس شەشە الادى.