دەنساۋلىق ساقتاۋ ءمينيسترى ەلدىڭ سانيتارلىق-ەپيدەميولوگيالىق جاعدايى تۇراقتى بولىپ تۇرعانىن ايتتى.
2021 جىلعى 22 قاراشادا كوروناۆيرۋسقا قارسى ريەۆاكسيناسيا باستالادى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.
بۇگىن وتكەن ۇكىمەت وتىرىسىندا ەلدەگى سانيتارلىق-ەپيدەميولوگيالىق احۋال قارالدى.
ۆيرۋستىڭ رەپرودۋكتيۆتى يندەكسى 0،90 قۇرايدى. ينفەكسيالىق توسەكتەر 30%، رەانيماسيالىق توسەكتەر 26% تولى. كوروناۆيرۋس ينفەكسياسىنىڭ تارالۋ قارقىنى بويىنشا شىمكەنت قالاسى، اقتوبە، اتىراۋ، الماتى، باتىس قازاقستان، تۇركىستان، جامبىل، قىزىلوردا، ماڭعىستاۋ جانە شىعىس قازاقستان وبلىستارى «جاسىل ايماقتا»، نۇر-سۇلتان جانە الماتى قالالارى، اقمولا جانە قاراعاندى وبلىستارى «سارى ايماقتا» ورنالاسقان. قوستاناي، پاۆلودار جانە سولتۇستىك قازاقستان وبلىستارى «قىزىل ايماقتا» تۇر.
بۇگىنگى تاڭدا شامامەن 8،5 ملن ادام ۆاكسينانىڭ ءبىرىنشى كومپونەنتىن، 7،7 ملن-نان استام ادام ەكىنشى كومپونەنتىن الدى. ەۋروپانىڭ ءبىرقاتار ەلىندە، سونداي-اق قازاقستانمەن شەكارالاس مەملەكەتتەردە سىرقاتتانۋشىلىقتىڭ ءوسۋىن ەسكەرە وتىرىپ، ۇكىمەت باسشىسى سانيتاريالىق تالاپتار شارالارىنىڭ جاپپاي ساقتالۋىن قامتاماسىز ەتۋدى، مونيتورينگتىك توپتاردىڭ تالاپتاردىڭ ساقتالۋىن باقىلاۋ جونىندەگى جۇمىسىنىڭ تيىمدىلىگىن كۇشەيتۋدى جانە بۇزۋشىلارعا قاتاڭ شارالار قابىلداۋدى تاپسىردى.
«22 قاراشادان باستاپ بۇعان دەيىن ەكپە العان ازاماتتاردى ريەۆاكسيناسيالاۋ باستالادى. وسىعان بايلانىستى ەگۋ پۋنكتتەرىنىڭ، مەديسينالىق ۇيىمداردىڭ جانە مەديسينا قىزمەتكەرلەرىنىڭ دايىندىعىن قامتاماسىز ەتۋ قاجەت»، — دەدى اسقار مامين.