ۇكىمەت كەلەر جىلى 31 زاڭ جوباسىن جاساماق

ونىڭ 11ء-ى – ءبىرىنشى جارتىجىلدىققا، 20-سى – جىلدىڭ ەكىنشى جارتىسىنا جوسپارلانعان.

2022 جىلى ۇكىمەت 31 زاڭ جوباسىن ازىرلەيدى، دەپ حابارلايدى Almaty-akshamy.kz ۇكىمەتتىڭ رەسمي سايتىنا سىلتەمە جاساپ.

ۇكىمەت وتىرىسىندا ۇكىمەتتىڭ زاڭ جوبالاۋ جۇمىستارىنىڭ 2022 جىلعا ارنالعان جوسپارىنىڭ جوباسى قارالدى.

ادىلەت ءمينيسترى مارات بەكەتايەۆ ۇكىمەتتىڭ زاڭ جوبالاۋ جۇمىستارىنىڭ 2022 جىلعا ارنالعان جوسپارى 31 زاڭ جوباسىن ازىرلەۋدى جانە پارلامەنتكە ەنگىزۋدى كوزدەيتىنىن، ونىڭ ىشىندە 11ء-ى – ءبىرىنشى جارتىجىلدىققا، 20-سى – جىلدىڭ ەكىنشى جارتىسىنا جوسپارلانعانىن ايتتى.

زاڭ جوبالارى مەملەكەتتىك قىزمەت، جىلۋ ەنەرگەتيكاسى، دەنساۋلىق ساقتاۋ، ءبىلىم بەرۋ، مادەنيەت جانە سپورت سالالارىن ودان ءارى دامىتۋعا جانە رەتتەۋگە، تەرروريزمدى قارجىلاندىرۋعا جانە كىرىستەردى زاڭداستىرۋعا قارسى ءىس-قيمىل تاسىلدەرىن، اگلومەراسيالاردى دامىتۋعا، ازاماتتىق جانە قىلمىستىق زاڭنامانى جەتىلدىرۋگە جانە ت. ب. باعىتتالعان.

«قازاقستان رەسپۋبليكاسىنىڭ الەۋمەتتىك كودەكسىن» جانە «تۇتىنۋشىلاردىڭ قۇقىقتارىن قورعاۋ تۋرالى»، «سايكەستىكتى باعالاۋ تۋرالى»، «كاسىبي بىلىكتىلىك تۋرالى»، «جىلۋ ەنەرگەتيكاسى تۋرالى»، «اگلومەراسيالاردى دامىتۋ تۋرالى» بەس جاڭا زاڭ ازىرلەۋ جوسپاردا بار. ۇكىمەت باسشىسى مەملەكەتتىك ورگانداردىڭ ءبىرىنشى باسشىلارىنا زاڭ جوبالارىنىڭ ساپاسىن جانە ولاردىڭ پارلامەنتكە ۋاقىتىلى ەنگىزىلۋىن قامتاماسىز ەتۋدى تاپسىردى.