ەلىمىز تابيعي ۋران ءوندىرۋ بويىنشا الەمدە ءبىرىنشى ورىندا
مەملەكەت باسشىسى بىرىكككەن اراب امىرلىكتەرىنە رەسمي ساپارى اياسىندا «ابۋ دابي تۇراقتى دامۋ اپتالىعى» سامميتىنە قاتىستى. پرەزيدەنت سامميت قاتىسۋشىلارىنا قازاقستانداعى جاڭارتىلاتىن جانە بالامالى ەنەرگيا كوزدەرىنىڭ پەرسپەكتيۆالارى تۋرالى مالىمەت بەردى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
– كۇن مەن جەل فاكتورلارى، سونداي-اق ۇلان-عايىر جەرىمىز قازاقستاننىڭ كليماتتى ساقتاۋ جولىنداعى جاھاندىق ىس-ارەكەتتەرگە اتسالىسىپ، جاڭارتىلاتىن ەنەرگيا سەكتورىندا كوش باستاۋىنا مۇمكىندىك بەرەدى. وسىعان بايلانىستى ءبىز ينۆەستورلارعا اناعۇرلىم ۇتىمدى شارتتار ۇسىنۋ ءۇشىن نورماتيۆتىك-قۇقىقتىق بازانى جەتىلدىرىپ جاتىرمىز. جالپى، ءبىزدىڭ جوسپارىمىز بويىنشا 2035 جىلعا قاراي قازاقستاندا 6،5 گۆت جاڭارتىلاتىن ەنەرگيا رەسۋرسى پايدا بولادى. بۇل ورايدا «جاسىل سۋتەگى» – كەلەشەگى زور باعىتتىڭ ءبىرى. حالىقارالىق ساراپشىلاردىڭ پىكىرىنشە، ەلىمىز سۋتەگىن ەكسپورتتاۋشىلاردىڭ العاشقى وندىعىنا كىرە الادى، – دەدى قاسىم-جومارت توقايەۆ.
پرەزيدەنت اتوم ەنەرگياسىن پايدالانۋ ماسەلەسىنە نازار اۋدارىپ، بۇل اۋاعا تارايتىن پارنيكتىك گازداردىڭ كولەمىن ازايتۋعا اسەر ەتەتىن باستى فاكتوردىڭ ءبىرى ەكەنىن ايتتى. سونداي-اق قازاقستاننىڭ اتوم ەنەرگەتيكاسىن دامىتۋداعى ارتىقشىلىقتارىنا توقتالدى.
– ەلىمىز تابيعي ۋران ءوندىرۋ بويىنشا الەمدە ءبىرىنشى ورىندا. ءبىز يادرولىق وتىننىڭ كومپونەنتتەرىن ءوز ەلىمىزدە وندىرەمىز جانە اتوم ەنەرگياسىن ءقاۋىپسىز پايدالانۋ ءىسىن ودان ءارى دامىتۋعا مۇمكىندىگىمىز مول. ءبىزدىڭ پىكىرىمىزشە، بۇل – ايماقتىق جانە جاھاندىق دەڭگەيدەگى ساۋدا مەن ينۆەستيسيا ءۇشىن كەلەشەگى مول سالا، – دەدى مەملەكەت باسشىسى.