پرەمەر-مينيستردىڭ ورىنباسارى – جاساندى ينتەللەكت جانە سيفرلىق دامۋ ءمينيسترى جاسلان مادييەۆ قازاقستاندىقتار ينتەرنەتپەن قاشان تولىق قامتىلاتىنىن مالىمدەدى، دەپ حابارلايدى aqshamnews.kz
ونىڭ ايتۋىنشا، سوڭعى ءۇش جىلدا تەلەكوممۋنيكاسيا سالاسىنا 1 تريلليون تەڭگەدەن استام ينۆەستيسيا باعىتتالعان. ءقازىر 20 ميلليوننان استام ءموبيلدى ابونەنت جانە 3،7 ميلليون تىركەلگەن پايدالانۋشى بايلانىس قىزمەتتەرىن قولدانىپ ءجۇر. ينتەرنەتتىڭ ورتاشا جىلدامدىعى 94 مبيت/س دەڭگەيىنە جەتتى.
«وسى جىلى ينتەرنەت ترافيگىن تۇتىنۋ ايتارلىقتاي ارتقانىن اتاپ ءوتۋ قاجەت. ول وتكەن جىلمەن سالىستىرعاندا ەكى ەسە كوپ بولادى دەپ كۇتىلۋدە. سالانى دامىتۋ 2024–2027 جىلدارعا ارنالعان «قولجەتىمدى ينتەرنەت» ۇلتتىق جوباسى اياسىندا ىسكە اسىپ جاتىر. 2027 جىلدىڭ سوڭىنا دەيىن حالىقتىڭ 100%-ى ينتەرنەتپەن قامتىلادى. ينتەرنەت جىلدامدىعى 100 مبيت/س-تان اسىپ، وپتيكالىق بايلانىس جەلىلەرى اۋىلدىق ەلدى مەكەندەردىڭ 90%-ىنا دەيىن تارتىلادى»، - دەدى مادييەۆ ۇكىمەت وتىرىسىندا.
سونىمەن قاتار مينيستر اۋىلداردى ينتەرنەتپەن قامتۋ ماسەلەسىنە توقتالدى. ءقازىر قازاقستاندا 6 179 اۋىلدىق ەلدى مەكەن بار. ولاردىڭ 2606-سى ماگيسترالدىق تالشىقتى-وپتيكالىق بايلانىس جەلىلەرىنە (ۆولس) قوسىلعان. 663 اۋىلدا جەرگىلىكتى جەلى بار.
«2026 جىلدىڭ سوڭىنا دەيىن تاعى 3 مىڭنان استام اۋىلدى ماگيسترالدى تالشىقتى-وپتيكالىق بايلانىس جەلىسىنە قوسۋ كوزدەلگەن. ناتيجەسىندە 2027 جىلدىڭ سوڭىنا قاراي ەلىمىزدەگى 4 786 اۋىلدا وپتيكالىق جەلى تىكەلەي ۇيلەرگە دەيىن جەتكىزىلەدى. وسىلايشا اۋىلداردىڭ 90%-دان استامى سىمدى تەحنولوگيالار ارقىلى جوعارى جىلدامدىقتى ينتەرنەتكە قوسىلادى. وسى جوبالاردى جۇزەگە اسىرۋ ءۇشىن 2027 جىلدىڭ سوڭىنا دەيىن جالپى كولەمى 323 ملرد تەڭگەنى قۇرايتىن ينۆەستيسيا قاراستىرىلعان»، - دەدى ۆەدومستۆو باسشىسى.
مادييەۆتىڭ ايتۋىنشا، اۋىلداردىڭ قالعان 10 پايىزىندا ەل حالقىنىڭ 1 پايىزدان از بولىگى تۇرادى. مۇنداي ەلدى مەكەندەر ينتەرنەتپەن سپۋتنيكتىك تەحنولوگيالار ارقىلى قامتاماسىز ەتىلەدى.