ەلىمىزدىڭ قالالارىندا ينتەرنەتكە ءبىرىڭعاي ءقاۋىپسىز قولجەتىمدىلىكتى قامتاماسىز ەتەتىن ۇلتتىق Wi-Fi وپەراتورىن قۇرۋ جوسپارلانىپ وتىر، دەپ حابارلايدى aqshamnews.kz.
بۇل تۋرالى ۇكىمەت وتىرىسىندا Freedom Telecom Operations" كومپانياسىنىڭ باسشىسى قايرات احمەتوۆ ايتتى. جوبا الەۋمەتتىك ماڭىزى بار نىسانداردا جەلىنى ورنالاستىرۋدى كوزدەيدى. ناقتىراق ايتساق، شەكارا بەكەتتەرىندە، اۋەجايلاردا، تەمىرجول جانە اۆتوۆوكزالداردا، سونداي-اق مەكتەپتەر مەن مەديسينالىق مەكەمەلەردە پايدا بولادى.
"ءبىز قۇرىپ جاتقان ينفراقۇرىلىم قازاقستاننىڭ جي-ەكونوميكانى قالىپتاستىرۋ باعىتىن قولداي وتىرىپ، جاساندى ينتەللەكت نەگىزىندە سيفرلىق سەرۆيستەر مەن شەشىمدەردى دامىتۋ پلاتفورماسىنا اينالۋدا"، — دەدى "Freedom Telecom Operations" كومپانياسىنىڭ باسشىسى قايرات احمەتوۆ.
ءبىرىنشى كەزەڭدە جوبا 10 قالادا 400 ورىندى قامتيدى. 2026 جىلعا قاراي جەلىنى 10 مىڭ قوسۋ نۇكتەسىنە دەيىن، ال 2027 جىلعا قاراي 20 مىڭعا دەيىن كەڭەيتۋ جوسپارلانۋدا.