Beeline Kazakhstan حولدينگىنىڭ پرەزيدەنتى ەۆگەنيي ءناستراديننىڭ ايتۋىنشا، كەلەسى جىلى تاريفتەر شامامەن 20 پايىزعا قىمباتتايدى، دەپ حابارلايدى aqshamnews.kz
«ءبىز باعالاردى جىلىنا ءبىر رەتتەن ءجيى كوتەرمەيمىز. كەلەر جىلى ءبارىمىزدى قوسىلعان قۇن سالىعىنىڭ قىمباتتاۋى كۇتىپ تۇر — بۇل سالاعا 35-40 ملرد تەڭگە شاماسىندا اسەر ەتەتىن ماڭىزدى فاكتور. ءبىز باعانى قاڭتار ايىندا وزگەرتۋدى جوسپارلاپ وتىرمىز. ال بيىل كليەنتتەر ءۇشىن تاريفتەر وسپەيدى. كەلەسى جىلى شامامەن 15-20% شاماسىندا بولادى»، — دەدى ناسترادين ۇكىمەتتە وتكەن باسپا ءسوز ءماسليحاتىندا.
«موبايل تەلەكوم-سەرۆيس» كومپانياسى دا جاڭا جىلدان باستاپ تاريفتەردى قىمباتتاتۋدى جوسپارلاپ وتىر.
«تاريف قىمباتتاۋىنىڭ باستى سەبەبى — حالىق تاراپىنان ءوسىپ جاتقان سۇرانىس پەن وعان ىلەسە الماي جاتقان ينفراقۇرىلىم. وپەراتورلار ينفراقۇرىلىمعا كوبىرەك ينۆەستيسيا سالۋعا ءماجبۇر. ءوزىمىزدىڭ بيۋدجەتتىك جوسپارلاۋىمىز اياسىندا ەكونوميكالىق جانە سالىق وزگەرىستەرىن، ينفلياسيالىق بولجامداردى ەسكەرەمىز. ءبىز تاريف جوسپارلارىن تۇزەتۋ مۇمكىندىگىن قاراستىرىپ جاتىرمىز. شامامەن 15-20% دەڭگەيىندە بولادى دەپ بولجاۋعا بولادى»، — دەدى «موبايل تەلەكوم-سەرۆيس» باسقارما ءتوراعاسى الەكساندر بابيچيەۆ.
ال «قازاقتەلەكوم» اق باس اكىمشىلىك ديرەكتورى ەرجان مەيراموۆتىڭ ايتۋىنشا، ۇيالى بايلانىس قىزمەتتەرىن كورسەتۋ ەرەجەلەرىندە وپەراتورلاردىڭ شىعىندارى ارتقان جاعدايدا تاريفتەردى كوتەرۋگە بولاتىن نورما بار.
«تاريف قۇرامىنا وپەراتورلاردىڭ ءبىرقاتار شىعىنى كىرەدى، سونىڭ ىشىندە ەلەكتر ەنەرگياسىنا، جابدىق ساتىپ الۋعا جۇمسالاتىن شىعىندار بار. ەگەر بۇل شىعىندار وسسە، ول تاريفتەردىڭ وسۋىنە اسەر ەتپەي قويمايدى»، — دەدى مەيراموۆ.