مەملەكەت باسشىسىنىڭ تاپسىرماسى بويىنشا دەنساۋلىق ساقتاۋ مينيسترلىگى پاسيەنتكە باعدارلانعان، مەديسينالىق كومەكتىڭ قولجەتىمدىلىگى مەن ساپاسىن ارتتىرۋعا باعىتتالعان سالانى جاڭعىرتۋ جانە دامىتۋ جونىندەگى ءىس-شارالار كەشەنىن جۇزەگە اسىرۋدا.
بۇل تۋرالى دەنساۋلىق ساقتاۋ ءبىرىنشى ۆيسە-مينيسترى تيمۋر سۇلتانعازييەۆ مالىمدەدى، - دەپ حابارلايدى Aqshamnews.kz.
ونىڭ ايتۋىنشا، پرەزيدەنت تاراپىنان دايەكتى قولداۋدىڭ ارقاسىندا دەنساۋلىق ساقتاۋ سالاسىنا جۇمسالاتىن مەملەكەتتىك شىعىندار سوڭعى جىلدارى ءۇش ەسەگە جۋىق ءوسىپ، 2025 جىلى 3 ترلن تەڭگەگە جەتكەن. بۇل مەديسينالىق كومەكتىڭ كولەمىن ەداۋىر كەڭەيتۋگە، ينفراقۇرىلىمدى اۋقىمدى تۇردە جاڭعىرتۋعا جانە مەديسينالىق ۇيىمداردىڭ ماتەريالدىق-تەحنيكالىق بازاسىن جاڭارتۋعا مۇمكىندىك بەردى.
ماسەلەن، رەسپۋبليكالىق ماڭىزى بار نەگىزگى نىساندار پايدالانۋعا بەرىلدى. ولار – ۇلتتىق ونكولوگيا ورتالىعى، استاناداعى شۇعىل مەديسينا ورتالىعى، سونداي-اق الماتىداعى ۇلتتىق جۇقپالى اۋرۋلار ورتالىعى.
مەملەكەت باسشىسىنىڭ تاپسىرماسى بويىنشا جۇزەگە اسىپ جاتقان اۋىلدىق دەنساۋلىق ساقتاۋ سالاسىن جاڭعىرتۋ جونىندەگى اۋقىمدى جوبا اياقتالۋدا. ءقازىردىڭ وزىندە اۋىلدىق جەرلەردە 650-دەن استام مەديسينالىق نىسان پايدالانۋعا بەرىلدى، بۇل قالا مەن اۋىل اراسىنداعى الشاقتىقتى ەداۋىر ازايتتى، - دەپ اتاپ ءوتتى تيمۋر سۇلتانعازييەۆ.
ۇزاق ۋاقىتتان بەرى العاش رەت تاريفتىك ساياسات قايتا قارالدى: بوساندىرۋ جانە پەدياتريا تاريفتەرى كوتەرىلدى، اۋرۋلاردىڭ الدىن الۋعا، ەرتە دياگنوستيكالاۋعا جانە مەديسينالىق قىزمەتتەردىڭ ساپاسىن ارتتىرۋعا باسا نازار اۋدارىلدى. كلينيكالىق باعىتتاردا ەلەۋلى پروگرەسكە قول جەتكىزىلدى، انا مەن بالانىڭ دەنساۋلىعىن ساقتاۋ جۇيەسى نىعايتىلدى. ونكولوگيالىق قىزمەت بەلسەندى دامىپ كەلەدى، بۇرىن نەگىزىنەن شەتەلدە قول جەتىمدى بوپ كەلگەن جوعارى دالدىكتەگى جانە جۇمساق ەمدەۋ ادىستەرى ەنگىزىلۋدە.
دارىلىك ساياساتقا دەگەن جاڭاشا كوزقاراس دارى-دارمەكپەن قامتاماسىز ەتۋدىڭ تۇراقتىلىعىن ارتتىرىپ، بيۋدجەت قاراجاتىن ايتارلىقتاي ۇنەمدەۋگە مۇمكىندىك بەردى. مەملەكەت باسشىسىنىڭ قازاقستان حالقىنا جولداۋىندا بەلگىلەپ بەرگەن ستراتەگيالىق باسىمدىق رەتىندە سيفرلاندىرۋعا ەرەكشە نازار اۋدارىلادى.
سالادا "eDensaulyq" ەكوجۇيەسى قالىپتاسىپ كەلەدى، دارىگەردى قولداۋ جانە مەديسينالىق كومەكتىڭ ساپاسىن ارتتىرۋ قۇرالى رەتىندە جاساندى ينتەللەكت نەگىزىندەگى شەشىمدەر ەنگىزىلۋدە، - دەپ اتاپ ءوتتى ءبىرىنشى ۆيسە-مينيستر.
سونىمەن قاتار پارلامەنت مەملەكەت باسشىسىنىڭ تاپسىرماسى بويىنشا ازىرلەنگەن مەديسينا قىزمەتكەرلەرىن قورعاۋ تۋرالى زاڭناماعا ەنگىزىلگەن تۇزەتۋلەردى ماقۇلدادى. قىزمەتتىك مىندەتتەرىن اتقارۋ كەزىندە مەديسينا قىزمەتكەرلەرى مەن جەدەل جاردەم جۇرگىزۋشىلەرىنە قاتىستى جاسالعان زورلىق-زومبىلىق ءۇشىن جەكە قىلمىستىق جاۋاپكەرشىلىك ەنگىزىلىپ جاتىر، سونداي-اق دارىگەرلەردىڭ كاسىبي جاۋاپكەرشىلىگىن ساقتاندىرۋ تەتىگى ىسكە قوسىلدى. الەۋمەتتىك قولداۋ شارالارىنىڭ ارقاسىندا دارىگەرلەردىڭ تاپشىلىعى 19%-عا، ورتا مەديسينالىق پەرسونال 7%-عا، اۋىلدىق جەرلەردە 16%-عا تومەندەدى.
2026 جىلدان باستاپ ينفەكسيالىق قىزمەتتەر مەن جەدەل مەديسينالىق جاردەم قىزمەتكەرلەرىنىڭ جالاقىسىن ارتتىرۋ قاراستىرىلعان، ال دارىگەرلەرگە قاتىستى زورلىق-زومبىلىق ءۇشىن جاۋاپكەرشىلىك كۇشەيتىلەدى. ساقتاندىرۋ مودەلىنە كوشۋدى، حالىقتى قامتۋ كولەمىن كەڭەيتۋدى جانە مەديسينالىق قىزمەتتەر ساپاسىن مەملەكەتتىك باقىلاۋدى قالپىنا كەلتىرۋدى كوزدەيتىن مىندەتتى الەۋمەتتىك مەديسينالىق ساقتاندىرۋ جۇيەسىن جەتىلدىرۋ جونىندەگى زاڭ قابىلداندى، - دەدى تيمۋر سۇلتانعازييەۆ.
سالانى دامىتۋدىڭ ستراتەگيالىق باسىمدىقتارى ايقىندالدى: دەنساۋلىق ساقتاۋدى دامىتۋدىڭ 2029 جىلعا دەيىنگى تۇجىرىمداماسى جانە مەديسينالىق كومەكتىڭ ساپاسىن باسقارۋدىڭ كەشەندى جوسپارى ازىرلەندى.
ءبىرىنشى ۆيسە-مينيستر اتاپ وتكەندەي، قابىلدانىپ جاتقان شارالار ايتارلىقتاي ناتيجە بەرە باستادى. ماسەلەن، حالىقتىڭ بولجامدى ءومىر ءسۇرۋ ۇزاقتىعى 75،8 جىلدى قۇرايدى، ءولىم-جىتىم كورسەتكىشتەرى تومەندەۋدە. جالپى ءولىم-جىتىم 2،6%-عا، نارەستە ءولىمى 18%-عا قىسقاردى، ال قازاقستان حالىقارالىق رەيتينگتەردەگى ءوز پوزيسياسىن جاقسارتا وتىرىپ، ادام دامۋى يندەكسىندە جەتى تارماققا كوتەرىلدى.