مەملەكەت باسشىسىنىڭ تۇراقتى ەكونوميكالىق ءوسۋدى قامتاماسىز ەتۋ جونىندەگى تاپسىرمالارىن ورىنداۋ شەڭبەرىندە ۇكىمەت وتىرىسىندا ەلدىڭ 2026-2028 جىلدارعا ارنالعان الەۋمەتتىك-ەكونوميكالىق دامۋ بولجامى قارالدى، دەپ حابارلايدى aqshamnews.kz
نەگىزگى ماكروەكونوميكالىق ينديكاتورلار تۋرالى پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين باياندادى.
بولجام نەگىزگى سەناريي نەگىزىندە قالىپتاسادى. وعان سايكەس 2026 جىلى ءجىو-نىڭ ناقتى ءوسۋى 5،4%-دى قۇرايدى، ال ءۇش جىلداعى ورتاشا جىلدىق قارقىن 5،3%-عا جەتەدى. نومينالدى ءجىو 2026 جىلى 183،8 ترلن تەڭگەدەن 2028 جىلى 229،8 ترلن تەڭگەگە دەيىن وسەدى.
ەكونوميكانىڭ ءوسۋىنىڭ نەگىزگى درايۆەرلەرى ناقتى سەكتور مەن قىزمەت كورسەتۋ سالاسى بولادى. وڭدەۋشى ونەركاسىپتە ينۆەستيسيالىق جوبالاردى جۇزەگە اسىرۋ ەسەبىنەن ءوسۋ قارقىنىنىڭ 2026 جىلعى 6،2%-دان 2028 جىلى 6،6%-عا دەيىن ۇلعايۋى بولجانادى. قۇرىلىستاعى ءۇش جىلداعى ورتاشا ءوسىم 11،0%، كولىك سالاسىندا – 10،1%، ساۋدادا – 6،7% دەڭگەيىندە كۇتىلۋدە.
مينيستر بولجامدى كەزەڭدە وڭ ساۋدا بالانسى ساقتالاتىنىن اتاپ ءوتتى. ەكسپورت 2026 جىلى $77،1 ملرد-تان 2028 جىلى $83،7 ملرد-قا دەيىن، يمپورت – $67،7-دان $75،2 ملرد-قا دەيىن وسەدى. ينفلياسيا بويىنشا بولجام 2028 جىلعا قاراي 5،0 – 7،0% دەڭگەيىندە ايقىندالدى.
ماكرو بولجامنىڭ نەگىزىندە الداعى ءۇش جىلدىق كەزەڭگە ارنالعان بيۋدجەت پارامەترلەرى قالىپتاستىرىلدى. رەسپۋبليكالىق بيۋدجەتتىڭ كىرىستەرى 2026 جىلى 19،2 ترلن تەڭگەنى قۇرايدى، كەيىننەن 2028 جىلى 23،2 ترلن تەڭگەگە دەيىن وسەدى دەپ بولجانۋدا. ۇلتتىق قوردان كەپىلدەندىرىلگەن ترانسفەرت جىل سايىن 2، 77 ملرد تەڭگە مولشەرىندە ايقىندالاى.
بيۋدجەت تاپشىلىعى 2026 جىلى جىو-گە 2،5% دەڭگەيىندە ايقىندالدى، 2028 جىلى جىو-گە 0،9%-عا دەيىن تومەندەدى. بۇل رەتتە مۇناي ەمەس تاپشىلىق جىو-گە قاتىستى 4،9%-دان 2،7%-عا دەيىن قىسقارادى.
«كىرىستەر مەن شىعىستاردىڭ وسىنداي كولەمدەرىندە بيۋدجەت نىسانالى ترانسفەرت تۇرىندە ۇلتتىق قوردان قوسىمشا قاراجات تارتۋدىڭ قاجەتتىلىگىنسىز ءوزىن-وزى قامتاماسىز ەتەدى»، - دەپ اتاپ ءوتتى ۆيسە-پرەمەر.