قاۋىپسىزدىك – قانداي جاعدايدا جۇرسەڭىز دە، ەڭ ءبىرىنشى ويلاۋ كەرەك نارسە.
Ernur.kz سايتى شەت ەلگە، جات جەرگە ساپارلايتىن بولساڭىز، وسى تۇسىن مۇقيات قاراستىرۋدى ۇسىنادى، دەپ حابارلايدى aqshamnews.kz.
ويتكەنى، ساياحات كەزىندە جاقسى دەمالۋ – جايلى مەكەن، جىلى سۋ، قۇم مەن ادەمى پەيزاجدان عانا تۇرمايدى. وزىڭىزگە تونگەن ءبىر عانا قاتەر قانشاما اسەردىڭ كۇشىن ءبىر-اق ساتتە جويىپ جىبەرەدى. ازداعان كومەك بولسىن، 2025 جىلى تۋريستەر ءۇشىن ەڭ ءقاۋىپسىز سانالاتىن ەلدەر ءتىزىمىن ۇسىنامىز. قاۋىپسىزدىك رەيتينگى: مەديسينالىق قىزمەت كورسەتۋ ساپاسى، ترانسپورتتىق ينفراقۇرىلىم، قىلمىستىق دەڭگەيى، تەرروريستىك قاۋىپ-قاتەر، ەكولوگيالىق جاعداي، تابيعي اپاتتار ورىن الۋ جيىلىگى، حالقىنىڭ تۇرمىستىق دەڭگەيى مەن جۇقپالى اۋرۋلار، ت.س.س. ءارتۇرلى كريتەرييلەردى قولدانا وتىرىپ جاسالعان.
شۆەيساريا
سوڭعى جىلدارى شۆەيساريا جاھاندىق بەيبىتشىلىك يندەكسىندە (Global Peace Index) ەڭ بەيبىت ەلدەر قاتارىنىڭ الدىن بەرمەي ءجۇر. مۇندا ۇرلىق، توناۋ، اۆتوكولىك ۇرلاۋ، باسقا دا ۇساق زاڭبۇزۋشىلىقتاردى قوسا العاندا، قىلمىس دەڭگەيى وتە تومەن. ەلدە كيبەرقىلمىسقا قارسى كۇرەستە بەلسەندى شارالار قابىلدانعان. قوعامدىق كولىك جۇيەسى دە الەمدەگى ەڭ ءقاۋىپسىز جانە تيىمدىلەردىڭ ءبىرى بولىپ سانالادى. پويىزدار مەن اۆتوبۋستاردىڭ تازالىعى، ۋاقتىلى كەلۋى مەن قاۋىپسىزدىكتى باقىلاۋ جۇيەلەرى كوڭىلگە سەنىم ۇيالاتادى. اركىم ءوزىن ءوز ۇيىندەگىدەي ەركىن سەزىنۋىنە جاعداي جاسالعان.
يسلانديا
يسلانديا الەمدەگى ەڭ ءقاۋىپسىز ەلدەردىڭ ءبىرى ەكەنى كوپتەگەن رەيتينگتەر مەن ستاتيستيكامەن دالەلدەنگەن. بۇل كورسەتكىشتى اتالعان ەل بىرنەشە جىل قاتارىنان ساقتاپ كەلەدى. مۇندا قاساقانا كىسى ءولتىرۋ دەڭگەيى 100 000 ادامعا شاققاندا شامامەن 1،5 وقيعا قۇرايدى. كۇش كورسەتۋ قىلمىستارى دا وتە تومەن دەڭگەيدە. ال اتىس قارۋىن پايدالانۋ جاعدايلارى مۇلدە جوق دەۋگە بولادى. يسلاندياداعى قاۋىپسىزدىكتىڭ كەپىلى – ەرەكشە ساياسي جانە الەۋمەتتىك جۇيەسى، جوعارى دەڭگەيدەگى الەۋمەتتىك قولداۋ مەن تەڭدىك. اسىرەسە ايەلدەر مۇندا جەكە ساياحاتتاعاندا وزدەرىن ايرىقشا ءقاۋىپسىز جانە جايلى سەزىنەدى ەكەن. ەكونوميكالىق تۇراقتىلىق پەن جۇمىسسىزدىق دەڭگەيىنىڭ تومەندىگى دە ەلدىڭ جالپى ءال-اۋقاتى مەن قاۋىپسىزدىگىنە وڭ اسەرىن تيگىزەدى.
كاتار
قاتار دا تۋريزم ءۇشىن ەڭ ءقاۋىپسىز ەلدەردىڭ ءبىرى رەتىندە تانىلدى. 118 ەل اراسىندا قىلمىس يندەكسى 13،3 جانە قاۋىپسىزدىك يندەكسى 86،7 بولىپ، ءبىرىنشى ورىنعا شىقتى. قاتاردا ينفراقۇرىلىم وتە جاقسى دامىعان. حالقىنىڭ ءومىر ءسۇرۋ دەڭگەيى وتە جوعارى. سونداي-اق تازالىقتى قامتاماسىز ەتۋ باعىتىندا «Qatar Clean» باعدارلاماسىمەن تانىمال.وول ءقوناقۇي سەكتورىندا جوعارى گيگيەنالىق ستاندارتتاردى ساقتاۋعا باعىتتالعان.
اۋستريا
اۆستريا جوعارى الەۋمەتتىك قورعاۋ دەڭگەيى، قىلمىس دەڭگەيىنىڭ تومەندىگى جانە تابيعي اپاتتاردى باسقارۋداعى تۇراقتىلىعى ارقاسىندا دەمالىس ءۇشىن ەڭ ءقاۋىپسىز ەلدەردىڭ ءبىرى بولىپ تۇر. دەنساۋلىق ساقتاۋ جۇيەسى جوعارى ساپامەن جانە مەديسينالىق قىزمەتتەردىڭ قولجەتىمدىلىگىمەن ەرەكشەلەنەدى، ەۋروپاداعى ەڭ جاقسى كولىك جۇيەلەرىنىڭ ءبىرى وسى ەلدە. جاقسى دامىعان اۆتوجولدار مەن تەمىرجول جەلىلەرى ساپارىڭىزدى ىڭعايلى ءارى ءقاۋىپسىز ەتەدى.
فينليانديا
فينليانديا الەمدىك بەيبىتشىلىك يندەكسىندە 13-ورىندى يەلەندى. بۇل ەلدەگى قىلمىس دەڭگەيىنىڭ تومەندىگى مەن تۇراقتى جاعدايدى كورسەتەدى. فينليانديانىڭ كولىك جۇيەسى جاقسى دامىعان، ول جولدار، تەمىرجولدار مەن قوعامدىق كولىك جەلىلەرىن قامتيدى، بۇل تۇرعىندار مەن تۋريستەر ءۇشىن قوزعالىس قاۋىپسىزدىگى مەن ىڭعايلىعىن قامتاماسىز ەتەدى. ەل قاۋىپسىزدىك شارالارىن قاتاڭ ساقتايدى، بۇل تەرروريزم ءقاۋپىنىڭ تومەن بولۋىنا مۇمكىندىك بەرەدى. گەوگرافيالىق ورنالاسۋى مەن توتەنشە جاعدايلارعا ءتيىمدى ارەكەت ەتۋ جۇيەسىنىڭ ارقاسىندا فينليانديا تابيعي اپاتتارعا جاقسى دايىندالعان.
نورۆەگيا
نورۆەگيادا قاۋىپسىزدىك شارالارى بيلىك ورگاندارى تاراپىنان جاقسى رەتتەلگەن. ەڭ ءجيى كەزدەسەتىن قىلمىستار – ۇرلىق جانە جول ەرەجەلەرىن بۇزۋ. ال كۇش قولدانۋ قىلمىستارى جالپى كورسەتكىشتىڭ وتە از بولىگىن قۇرايدى.
دانيا
دانيا جالعىز ساياحاتتايتىن ايەلدەر ءۇشىن ءقاۋىپسىز باعىتتار تىزىمىندە ءبىرىنشى ورىن الادى. مۇندا بارلىق تۇرعىندار ءۇشىن قولجەتىمدى امبەباپ دەنساۋلىق ساقتاۋ جۇيەسى ورناتىلعان. ەلدە مەديسينالىق قىزمەتتەردىڭ كوپشىلىگى تەگىن ۇسىنىلادى. مەملەكەت حالىقتىڭ فيزيكالىق دەنساۋلىعىنا دا جەتكىلىكتى كوڭىل بولەدى. قوعامدىق كولىك جۇيەسى جاقسى دامىعان. ۆەلوسيپەدشىلەرگە ارنالعان جولاقتار وتە كوپ. ەكولوگيالىق جاعدايدى جاقسارتۋ جانە تۇراقتى دامۋ باعىتىندا بەلسەندى جۇمىس ىستەيدى. ەل ءتۇرلى ەكولوگيالىق باستامالار بويىنشا الەمدە العاشقى ورىنداردا تۇر. تابيعات رەسۋرستارىن قورعاۋ جانە لاستانۋدى ازايتۋ ماقساتىندا شارالار قابىلدايدى. تابيعي اپاتتار ءقاۋپى باسقا ەلدەرمەن سالىستىرعاندا الدەقايدا تومەن.
قاۋىپسىزدىكپەن قاتار، تۋريستەر ءۇشىن ءقاۋىپتى ەلدەر رەيتينگى دە جاسالادى. بۇل ءتىزىمنىڭ باسىندا سيريا، اۋعانستان، يراك، سۋدان، سومالي، يەمەن، كونگو، پاكىستان، چاد، مالي، كولۋمبيا تۇر. اتالعان ەلدەردە قىلمىس دەڭگەيى جوعارى، ساياسي حال-احۋالى تۇراقسىز، تابيعي اپات ءقاۋپى دە اياق استىندا. اسكەري قايشىلىقتار، قۇقىق قورعاۋ ءىسىنىڭ جاقسى ۇيىمداستىرىلماۋى، مەديسينالىق قىزمەت پەن توتەنشە جاعدايلاردا كورسەتىلەتىن كومەكتىڭ قولجەتىمسىزدىگى بۇل ەلدارگە كەلگىسى كەلەتىن ءتۋريستى «جەتى رەت ولشەپ، ءبىر رەت كەسۋگە» يتەرمەلەيدى. الەمنىڭ قاي تۇكپىرىندە بولساڭىز دا، قاۋىپسىزدىك ورگاندارىنان قامقورلىق سۇراۋعا قۇقىلىسىز.