قازاقستاندىقتار 2024 جىلى شەتەلگە ءجيى ساياحات جاساپ، تانىمال تۋريستىك باعىتتارعا رەكوردتىق ساپارلار جاسادى.
وسى جىلدىڭ دەرەكتەرى مالديۆ ارالدارى، تايلاند، گرۋزيا جانە حاينان سياقتى ەلدەرگە قىزىعۋشىلىقتىڭ كۇرت ارتقانىن كورسەتەدى، دەپ حابارلايدى aqshamnews.kz.
«2024 جىلدىڭ قاڭتار-قازان ايلارىندا قازاقستاندىقتار مالديۆ ارالدارىنا 22،3 مىڭ رەت ساپار شەكتى. بۇل كورسەتكىش 2023 جىلدىڭ سايكەس كەزەڭىمەن سالىستىرعاندا 42%-عا كوپ. بۇل – 2009 جىلدان بەرى ستاتيستيكا جۇرگىزىلگەن ۋاقىت ىشىندەگى ەڭ جوعارى ناتيجە. قازاقستان تۋريستەر سانى بويىنشا جالپى اعىنىڭ 1،3%-ىن قۇراپ، 18-ورىندا تۇر»، — دەپ جازىلعان حابارلامادا.
تايلاند تا قازاقستاندىقتاردىڭ سۇيىكتى باعىتتارىنىڭ ءبىرى بولىپ وتىر. قاڭتار-قازان ايلارىندا بۇل ەلگە 144،3 مىڭ رەت ساپار جاسالدى. بۇل وتكەن جىلمەن سالىستىرعاندا 17%-عا كوپ. بۇل كورسەتكىش سوڭعى 15 جىلداعى ەڭ جوعارى ناتيجە.
«گرۋزياعا 2024 جىلدىڭ قاڭتار-قىركۇيەك ايلارى ارالىعىندا قازاقستاندىقتار 146،9 مىڭ رەت ساپار شەكتى. بۇل وتكەن جىلمەن سالىستىرعاندا 13%-عا كوپ جانە 2011 جىلدان بەرگى ەڭ جوعارى كورسەتكىش»، — دەپ جازادى ساراپشىلار.
حاينان ارالى قازاقستاندىق تۋريستەر ءۇشىن ەرەكشە تانىمال باعىتقا اينالدى. قاڭتار-قازان ايلارى ارالىعىندا حاينانداعى قوناقۇيلەردە قازاقستاندىقتار 35 مىڭ رەت تىركەلگەن. بۇل 2023 جىلمەن سالىستىرعاندا 1049%-عا ارتىق. مۇنداي ءوسىمنىڭ باستى سەبەبى – 2023 جىلدىڭ كۇزىنە قاراي ارالمەن تىكەلەي اۋە قاتىناسىنىڭ قايتا جاندانۋى. «قازاقستاندىقتاردىڭ شري-لانكاعا قىزىعۋشىلىعى دا ارتىپ كەلەدى. قاڭتار-قاراشا ايلارى ارالىعىندا بۇل ەلگە 9،5 مىڭ ساپار جاسالدى. بۇل وتكەن جىلمەن سالىستىرعاندا 3،5 ەسە كوپ جانە سوڭعى التى جىلداعى رەكوردتىق كورسەتكىش»، — دەلىنگەن ساراپشىلار ەسەبىندە.