بيىل ەلىمىزدەگى 500 اۋىلدىق ەلدى مەكەندە "اۋىل – ەل بەسىگى"باعدارلاماسى شەڭبەرىندە مىڭعا جۋىق جوبا ىسكە اسىرىلماق. وسى ماقساتتا 2025 جىلعا ارنالعان بيۋدجەتتەن 176،4 ملرد تەڭگە قاراستىرىلىپ وتىر.
جوبا 2019 جىلدان بەرى جۇزەگە اسىرىلۋدا. مەملەكەت باسشىسىنىڭ تاپسىرماسىمەن اۋىل تۇرعىندارىنىڭ ءومىر ءسۇرۋ ساپاسىن جاقسارتۋعا — ينجەنەرلىك، الەۋمەتتىك ينفراقۇرىلىمدى جاڭعىرتۋ، نەگىزگى قىزمەتتەرگە قول جەتكىزۋدى ارتتىرۋ، ءومىر سۇرۋگە قولايلى ورتا قۇرۋعا ارنالىپ وتىر.
2019-2024 جىلدارى اۋىلدى دامىتۋعا 524 ملرد تەڭگە ءبولىندى. 2،6 مىڭ تىرەك جانە سپۋتنيكتىك اۋىلدا 6،6 مىڭنان استام جوبا ورىندالدى. وسىنىڭ ارقاسىندا، 772 تۇرعىن ۇي-كوممۋنالدىق شارۋاشىلىق نىسانى، مەكتەپ، مەديسينالىق پۋنكت پەن مادەنيەت ءۇيى سياقتى 2،1 مىڭ الەۋمەتتىك نىسان، 3 مىڭنان اسا كەنتىشىلىك جول سالىنىپ، جوندەلگەن.