الماتىلىقتاردىڭ ۇيلەرىن توناپ جۇرگەن گاسترولەر ۇرىلار توبى ۇستالدى

ۇستالعاندار قاماۋعا الىندى.

بۇل توپتىڭ قۇرامىندا تاجىكستان مەن قىرعىزستاننىڭ ەكى ازاماتى  مەن جەرگىلىكتى تۇرعىن بولعان، دەپ حابارلايدى Almaty-akshamy.kz Polisia.kz-كە سىلتەمە جاساپ.

«بارلىعى ءۇش ادام ۇستالدى. باستى رولدەردى 42 جانە 39 جاستاعى شەتەلدىكتەر ءوزارا «بولىسكەن». ولار – ورىنداۋشىلار. تاسىمالداۋمەن ءبىزدىڭ جەرلەسىمىز، الماتى وبلىسىنىڭ تۇرعىنى اينالىسقان. ول 35 جاستا. قاسكويلەر اشكەرەلەنۋ قارساڭىندا شوقاي كوشەسىنىڭ بويىندا ورنالاسقان جەكە ۇيلەردىڭ ءبىرىن توناپ كەتكەن. قۇقىق بۇزۋشىلاردىڭ بوتەن ادامنىڭ ۇيىنە تەرەزە ارقىلى كىرگەنى انىقتالدى. ولاردىڭ سول كەزدەگى ولجاسى سيفرلىق، تۇرمىستىق تەحنيكا، سونىمەن قاتار ءۇي يەسىنىڭ جەكە زاتتارى بولدى. ەر ادام «كەلۋشىلەردەن» كەلتىرىلگەن ماتەريالدىق شىعىندى 45 000 تەڭگەگە باعالاعان»، – دەدى الماتى قالالىق پد كريمينالدىق پوليسيا باسقارماسىنىڭ باستىعى قۋاتبەك ناۋاتوۆ.

سپيكەردىڭ ايتۋىنشا، پوليسيانىڭ ارنايى جاساقتارى مەن مەدەۋ اۋداندىق پوليسيا قىزمەتكەرلەرىنىڭ كومەگىمەن جۇرگىزىلگەن جەدەل جانە ارنايى ءىس-شارالار ناتيجەسىندە«گاسترولەرلەر» ۇستالدى.

«ءبىز بۇل “تريو” جاساعان باسقا ەپيزودتاردى دا جوققا شىعارمايمىز، وسى باعىتتا جۇمىستى جالعاستىرامىز. سونىمەن قاتار، ۇرلانعان مۇلىكتى ساتۋ ارناسىن انىقتايمىز»، – دەدى ناۋاتوۆ.