234-كە جەتكىزۋ جوسپارلانىپ وتىر.
الداعى ءۇش جىلدا وتباسىن قولداۋ ورتالىقتارىنىڭ سانىن 234-كە جەتكىزۋ جوسپارلانىپ وتىر. بۇل تۋرالى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ بيىلعى جۇمىستارىنىڭ قورىتىندىسى ءمالىم ەتىلگەن بريفينگىدە ايتىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
العاش بولىپ بايانداما جاساعان سەنات دەپۋتاتى ءلاززات سۇلەيمەن بيىل جۇرگىزىلگەن شارالارعا توقتالدى. ونىڭ ايتۋىنشا، كوميسسيا مۇشەلەرى ەلىمىزدىڭ 18 وڭىرىندە بولىپ، تۇرعىنداردىڭ ۇسىنىس-پىكىرلەرىن تىڭداعان. ءلاززات سۇلەيمەن وسىلاردىڭ قورتىنىدىسى نەگىزىندە ناقتى جۇمىستار قولعا الىنعانىن اتاپ ءوتتى. سونىمەن قوسا، ول الداعى ءۇش جىلدا وتباسىلاردى قولداۋ ورتالىقتارىنىڭ سانىن 234-كە جەتكىزۋ جوسپارلانعانىن ايتتى.
«ءقازىر وتباسىلاردى قولداۋ ورتالىقتارىن قۇرۋ ىسكە اسىپ جاتىر. ەلىمىزدە وتباسىلاردى قولدايتىن 34 ورتالىق جۇمىس ىستەيدى. ءبىراق، ول ازدىق ەتەدى. 2025 جىلعا دەيىن 234 وتباسىن قولداۋ ورتالىعىن، ياعني جىل سايىن ورتا ەسەپپەن 40-50 ورتالىق اشپاقپىز. ول ۇلكەن قاراجاتتى قاجەت ەتەدى»، - دەدى ءلاززات سۇلەيمەن ورتالىق كوممۋنيكاسيالار قىزمەتىندە وتكەن بريفينگىدە.
ونىڭ ايتۋىنشا، تاياۋدا دەپۋتاتتار وتباسى ينستيتۋتىن نىعايتۋعا باعىتتالعان زاڭ جوباسىن ۇسىنعان. ول الداعى ۋاقىتتا قارالىپ، قابىلدانۋى مۇمكىن.