وتەماقىنى ساقتاندىرۋ كومپانياسى تولەيدى.
تولەمنەن باس تارتقان جانە قاناعاتتانباعان جاعدايدا پاسيەنت سوتقا جۇگىنۋگە قۇقىلى، دەپ حابارلايدى Almaty-akshamy.kz
پارلامەنت ءماجىلىسى مەديسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋدى جانە كاسىبي مىندەتتەرىن تيىسىنشە ورىنداماعانى ءۇشىن جازالاردى ىزگىلەندىرۋدى كوزدەيتىن زاڭ جوباسىن ءبىرىنشى وقىلىمدا ماقۇلدادى.
دەنساۋلىق ساقتاۋ ءمينيسترى اجار عينياتتىڭ ايتۋىنشا، زاڭ جوباسىندا مەديسينا قىزمەتكەرلەرىنىڭ كاسىپتىك جاۋاپكەرشىلىگىن ساقتاندىرۋ جۇيەسىن كەزەڭ-كەزەڭىمەن ەنگىزۋ تەتىگى مەن جولدارى قارالعان. مينيسترلىك زاڭ جوباسىن ازىرلەۋ بارىسىندا الەم ەلدەرىنىڭ تاجىريبەسىن زەردەلەگەن.
حالىقارالىق تاجىريبەدە مەديسينا قىزمەتكەرلەرىن قورعاۋ ءۇشىن قورلار مەن قاۋىمداستىقتار قۇرۋ ارقىلى، سونداي-اق جەكە نارىقتار ارقىلى كاسىپتىك جاۋاپكەرشىلىكتى مىندەتتى ساقتاندىرۋ جۇيەسى قولدانىلادى. كاسىپتىك جاۋاپكەرشىلىكتى ساقتاندىرۋ مىندەتى مەديسينا قىزمەتكەرلەرىنە نەمەسە دەنساۋلىق ساقتاۋ ۇيىمدارىنا جۇكتەلگەن.
«پاسيەنت قىزمەتتىڭ نەمەسە كوميسسيانىڭ شەشىمىمەن كەلىسپەگەن جاعدايدا شاعىم ساراپتامالىق قورىتىندى بەرۋ ءۇشىن دەنساۋلىق ساقتاۋ مينيستىرلىگى مەديسينالىق جانە فارماسيەۆتيكالىق باقىلاۋ كوميتەتىندە قارالادى. دالەلدەنگەن جاعدايدا شاعىم بويىنشا ماتەريالدار، ونىڭ ىشىندە سوت-مەديسينالىق ساراپتامانىڭ قورىتىندىسى مەديسينالىق ۇيىم ساقتاندىرىلعان ساقتاندىرۋ كومپانياسىنا بەرىلەدى»، - دەدى عينيات.
پاسيەنتكە كەلتىرىلگەن زيان ءۇشىن وتەماقى تولەۋدى ساقتاندىرۋ كومپانياسى جۇرگىزەدى. تولەمنەن باس تارتقان جانە قاناعاتتانباعان جاعدايدا پاسيەنت سوتقا جۇگىنۋگە قۇقىلى. ساقتاندىرۋ جارناسىنىڭ مولشەرى ءقاۋىپ دارەجەسىنە قاراي بەكىتىلگەن اكتۋارلىق ەسەپتەۋلەردىڭ نەگىزىندە مەديسينا قىزمەتكەرىنىڭ جاۋاپكەرشىلىك دارەجەسى ەسكەرىلە وتىرىپ ايقىندالادى. دەنساۋلىق ساقتاۋ مينيسترلىگى 2023 جىلدان باستاپ ساقتاندىرۋدى جۇمىس بەرۋشىنىڭ ەسەبىنەن جۇزەگە اسىرۋدى ۇسىنىپ وتىر. ال 2025 جىلدان باستاپ ساقتاندىرۋ سىيلىقاقىسى مەديسينالىق ۇيىم مەن مەديسينا قىزمەتكەرلەرى اراسىندا بولىنەدى، بۇل ىنتىماقتى كاسىپتىك جاۋاپكەرشىلىككە اكەلەدى.