ولاردى مەديسينالىق جابدىقپەن جاراقتاۋ كەزىندە وتاندىق وندىرۋشىلەرگە باسىمدىق بەرىلەتىن بولادى.
بۇگىن ق ر پرەمەر-مينيسترىنىڭ ورىنباسارى ەرالى لۇقپان ۇلى توعجانوۆ Medtech مەديسينالىق تەحنيكا جونىندەگى ءبىرىنشى حالىقارالىق فورۋمعا قاتىسۋ بارىسىندا وسىلاي دەدى، دەپ حابارلايدى Almaty-akshamy.
فورۋم 17ء-شى قازاقستاندىق حالىقارالىق Astana Zdorovie-2021 كورمەسى اياسىندا ءوتتى. ءىس-شاراعا دارىلىك پرەپاراتتاردى ازىرلەيتىن، وندىرەتىن جەتەكشى وتاندىق جانە شەتەلدىك فارماسيەۆتيكالىق كومپانيالار قاتىسۋدا.
فورۋم قاتىسۋشىلارىنا ارناعان سوزىندە ەرالى توعجانوۆ پاندەميا كەزەڭىندە اتالعان فورۋمدى وتكىزۋدىڭ وزەكتىلىگىن اتاپ ءوتتى: «پاندەميا ەلدى ۆاكسينالارمەن، دارىلىك زاتتارمەن عانا ەمەس، مەديسينالىق جابدىقتارمەن دە قامتاماسىز ەتۋ قاجەتتىگىن كورسەتتى. قازاقستاندا ءبىز مۇنى باسىم باعىت رەتىندە بەلگىلەدىك. ءبىزدىڭ ۇلكەن الەۋەتىمىز بەن مۇمكىندىكتەرىمىز بار».
ۆيسە-پرەمەر مەملەكەت باسشىسىنىڭ تاپسىرماسىن ورىنداۋ ماقساتىندا ۇكىمەت قازاقستاننىڭ فارماسيەۆتيكا سالاسىن دامىتۋ جونىندەگى ارنايى كەشەندى جوسپار قابىلداعانىن، ونى ىسكە اسىرۋ 2025 جىلعا قاراي وتاندىق ءوندىرىستىڭ دارىلىك زاتتارى مەن مەديسينالىق بۇيىمدارىنىڭ ۇلەسىن 50%-كە دەيىن ارتتىرۋعا مۇمكىندىك بەرەتىنىن مالىمدەدى.
ەرالى توعجانوۆ دەنساۋلىق ساقتاۋ جۇيەسىنىڭ ينفراقۇرىلىمىن ودان ءارى دامىتۋ تۋرالى ايتا كەلە، 2025 جىلعا دەيىن كەمىندە 20 زاماناۋي اۋرۋحانا، 3 ونكولوگيالىق ورتالىق، 12 زەرتحانا، مەديسينالىق بۇيىمداردى زەرتحانالىق جانە تەحنيكالىق سىناقتان وتكىزۋگە ارنالعان ورتالىق سالۋ جوسپارلانعانىن جەتكىزدى. ولاردى مەديسينالىق جابدىقپەن جاراقتاۋ كەزىندە وتاندىق وندىرۋشىلەرگە باسىمدىق بەرىلەتىن بولادى. سونداي-اق، ۆيسە-پرەمەر كورمەگە قاتىسۋشىلاردىڭ پاۆيلوندارىن ارالاپ، فارمكومپانيالار وكىلدەرى مەن مەديسينالىق تەحنيكا وندىرۋشىلەرىنە جەمىستى جۇمىس تىلەدى.