موتيۆاسيا - تەك جاقسى ويلاردىڭ جەمىسى
قازىرگى تاڭنىڭ ەڭ وزەكتى دۇنيەسى – موتيۆاسيا. ونى بىرەۋلەر كوكتەن، ەكىنشىلەرى جەردەن ىزدەۋدە. تاعى باسقالارى عالامدى شارلاۋدا. قالامگەر شەرحان مۇرتازا اتامىز ايتقانداي، «...ءبىر كەم دۇنيە!».
كۇندەلىكتى ۋاقىت جۇمىس پەن ءۇيدىڭ اراسىندا وتۋدە. الىپ قالالاردا ۋاقىتتىڭ ءبىراز بولىگىن جول ۇرلايدى. ۇرلاپ قانا قويمايدى. سونىمەن بىرگە شارشاۋعا الىپ كەلەدى. كوبىمىز وسىدان زەرىگەمىز. ءبىراق كەتىسە المايمىز. بۇگىنگى ەڭ وزەكتى تاقىرىپ تا وسى. سول سەبەپتى ءبىرشاما ويلاردى ورتاعا سالۋدى دۇرىس دەپ بىلدىك.
اۆستريالىق دارىگەر نيەۆرولوگ ءارى «پسيحواناليز» ءىلىمىنىڭ نەگىزىن سالۋشى زيگمۋند فرەيد ادام جانىنا نە كەرەكتىگى تۋراسىندا كوپ ىزدەنگەن. عالىم مىناداي ءبىر وي قالدىرىپتى. ول «ادام 80% سۋدان تۇرادى. ەگەر ادامنىڭ ارمانى نە ۇلى ماقساتى بولماسا، ول بار بولعانى تىگىنەن تۇرعان شالشىق قانا» دەپتى. ءدال ايتىلعان ناقىل. قازىرگى قوعامدا ءوزىنىڭ تۇپكى ماقساتىن جوعالتىپ، دىتتەگەن مۇددەسى جوق جان قۋىس كەۋدە سىقىلدى. بۇل قوعام وندايلىققا توزبەيدى. دارىگەر فرەيدتىڭ ايتپاعىنىڭ تۇپكى ءمانى وسىعان سايادى.
بىزدەر وسى ماقالا ارقىلى كوپتەگەن ادامداردىڭ جانىن جادىراتاتىن 5 كەڭەستى ۇسىنامىز:
ءبىرىنشى. باعدار جاساۋ كەرەك. قايدا، قالاي بارا جاتقانىڭىزدى اڭداعان ءجون. ول ءۇشىن ءسىز ءسۇرىپ وتىرعان قوعامنىڭ ىعىن باعدارلاعان ابزالىراق. ەگەر ءسىز مەكتەپتى اياقتاپ، ۋنيۆەرسيتەتكە تۇسپەك بولساڭىز، مۇقيات زەردەلەڭىز. قوعامعا قاجەتتى، سۇرانىسقا يە ماماندىقتى تاڭداڭىز. بۇل، ءبىر جاعىنان، بارىمىزگە بەلگىلى، قاراپايىم بولىپ كورىنۋى مۇمكىن. دەسە دە، وزگەنىڭ ايتۋىمەن جانى قالاماعان سالانى تاڭدايتىندار دا بار. ءبىراق، ودان تۇك شىقپاۋى ىقتيمال. سوندىقتان جۇرەك نەنى دۇرىس سانايدى، سوعان قۇلاق ءتۇرىڭىز. ال ەگەر ماڭىزدى تاڭداۋ الدىندا تۇرساڭىز، سول سالانىڭ مامانىنان نەمەسە كورەگەن كىسىدەن كەڭەس العان ارتىقتىق ەتپەيدى.
ەكىنشى. جەتىستىككە جەتكەن تۇلعانىڭ اۆتوبيوگرافياسىن وقىڭىز. ءداپ قازىرگىدەي ۋاقىت تىعىز زاماندا، دەرەكتى فيلمدەر مەن قىسقاشا موتيۆاسيالىق بەينەۇزىكتەر كورۋگە كەڭەس بەرەر ەدىك. ويتكەنى، ءسىزدىڭ جانىڭىزعا كەرەكتىنى اسەرلەندىرىپ تىڭداعانعا نە جەتسىن!
ءۇشىنشى. جاقسى جاندارمەن جولداس بولىڭىز. مۇمكىندىك تۋىپ جاتسا، سىيلاسىڭىز. اراسىندا سىرلاسىڭىز. دەگەنمەن، سىر الدىرماڭىز. ءبارىن ەلەپ-ەكشەپ، اڭداپ سويلەگەن ابزال بولماق. جولداعى بەيتانىس ادامعا ويىڭىزداعىنى ايتۋعا بولادى. ءبىراق، بۇل ارادا وزگە بىرەۋدىڭ ىعىنا ءتۇسىپ كەتۋدەن ساقتانىڭىز. مەيىلىنشە، جاسى ۇلكەن، كوپتى كورگەن كىسىمەن ديدارلاسىپ، سىر شەرتىسكەنگە نە جەتسىن؟!
ءتورتىنشى. ساياحاتتاۋعا ءجيى كوڭىل ءبولىڭىز. ول ءۇشىن مىندەتتى تۇردە گاۆاي ارالدارىنا كەتۋدىڭ قاجەتى جوق. دەسە دە، وعان بارىپ، دەمالىپ، ەل مەن جەر كورىپ قايتۋدان باس تارتپاعان ءجون. ويتكەنى، شەتەلگە شىقساڭىز، جاقسىنى كورەسىز، ءتاۋىر ادامدارمەن سويلەسەسىز، وزىڭىزگە قاجەتتىنى الاسىز. جەر-دۇنيەنىڭ عاجايىبىن سەزىنەسىز. وسىدان كەيىن باسىڭىزعا جاقسى يدەيالار كەلەدى. مىنە، تىلسىم، مىنە، كەرەمەت. وسى اتالعاندى ورىنداعىڭىز كەلسە، قىدىرۋدى اينالاڭىزداعى اسەم تابيعاتتان باستاڭىز. سوندا ءار نارسە ءوز رەتىمەن بولماق.
بەسىنشى. باسىڭىزدى كوپ نارسەگە قاتىرماڭىز. كەلەر 10-20 جىلدا نەندەي نارسە بولادى؟ ونىڭ ىشىندە تۇرمىستىق جاعداياتتارمەن مي قىرتىسىن تولتىرىپ الماڭىز. ماتەريالدىق جاعداي، ءسىزدىڭ مادەني رۋحانياتىڭىزدىڭ دەرتىنە اينالماسىن. ءبارى وتكىنشى، ءبارى شەشىلەدى. ەڭ نەگىزگى قاعيدا، كىرىس پەن شىعىستى ەسپتەپ وتىرىڭىز. كۇندەلىكتى ەسەبىڭىز انىق بولسا، ويىڭىز تەز شارشامايدى. سوندا عانا ومىرگە دەگەن قۇلشىنىس ويانادى.
جاقسى ومىرگە قادامدى بۇگىننەن قۇرىڭىز. ادامزاتقا ءاربىر ءسات قىمبات. ءاربىر كۇن باقىت. ءاربىر تاۋلىك مۇمكىندىك. ءاربىر جىلدار تاريح.
بۇل دۇنيەدە ادامعا بەرىلگەندەي مۇمكىنشىلىك وزگە ماقۇلىققا نە تىرشىلىك يەسىنە بەرىلمەگەن. ءاردايىم وسىنى ەستە ۇستاڭىز!
قۇلشىنىسىڭىز جاسىماسىن!!!