پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا جول سالاسىن دامىتۋ جانە اتالعان سالاعا سيفرلىق تەحنولوگيالاردى ەنگىزۋ ماسەلەلەرى قارالدى.
كولىك ءمينيسترى مارات قارابايەۆ، سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ اعىمداعى جاعداي تۋرالى، سونداي-اق جول اكتيۆتەرىنىڭ ساپاسى ۇلتتىق ورتالىعىنىڭ باسشىسى بولاتبەك ايتبايەۆ جانە ءبىرقاتار ءوڭىر اكىمدەرى بايانداما جاسادى، دەپ حابارلايدى aqshamnews.kz.
كولىك مينيسترلىگىنىڭ مالىمەتىنشە، 2024 جىلى قۇرىلىس-جوندەۋ جۇمىستارىمەن 12 مىڭ شاقىرىم جول، ونىڭ ىشىندە 8 مىڭ شاقىرىم – رەسپۋبليكالىق جول جەلىسى، 4 مىڭ شاقىرىم – جەرگىلىكتى جول قامتىلعان. مارات قارابايەۆ پرەمەر-مينيسترگە ۇزىندىعى 7 مىڭ شاقىرىمدى قۇرايتىن ءىرى اۆتوجول جوبالارى اياقتالعانىن، ستراتەگيالىق ماڭىزدى نىساندار: بۇقتىرما سۋ قويماسى ارقىلى وتەتىن كوپىر، شامالعان ستانساسىن اينالىپ وتەتىن جول وتپەسى، تۇركىستان وبلىسىندا ورنالاسقان ەلىمىزدەگى العاشقى تۋننەل پايدالانۋعا بەرىلگەنىن حابارلادى.
سونداي-اق قاراعاندى – الماتى، تالدىقورعان – وسكەمەن، اقتوبە – اتىراۋ – استراحان، قازتالوۆ – جانىبەك جانە ونەگە – سايقىن سياقتى نەگىزگى ماگيسترالداردا جول ءجۇرۋ قامتاماسىز ەتىلدى. وتكەن جىلدىڭ قورىتىندىسى بويىنشا رەسپۋبليكالىق جولداردىڭ قالىپتى جاعدايى 93%-عا، جەرگىلىكتى جولدار جاعدايى 89%-عا جەتكەنى اتاپ ءوتىلدى.
مەملەكەت باسشىسىنىڭ جولداردى جىل سايىن جاڭارتۋ جونىندەگى تاپسىرماسىنا سايكەس 2025 جىلعا 9،5 مىڭ شاقىرىمعا جۇمىس جوسپارلانعان، سونداي-اق اقتوبە – ۇلعايسىن، قاراعاندى – جەزقازعان، اتىراۋ – دوسسور، قىزىلوردا – سەكسەۋىل، سارىاعاش، قىزىلوردا، پەتروپاۆل، رۋدنىي، شىمكەنت جانە تۇركىستان قالالارىن اينالىپ ءوتۋ جوبالارىن ىسكە قوسۋ جانە 2،5 مىڭ شاقىرىمعا جوندەۋ جۇرگىزۋ كوزدەلگەن.
جول اكتيۆتەرىنىڭ ساپاسى ۇلتتىق ورتالىعىنىڭ باسشىسى بولاتبەك ايتبايەۆ ۇكىمەت وتىرىسى بارىسىندا 2024 جىلى رەسپۋبليكالىق جەلى نىساندارىن ساراپتامامەن قامتۋ 100%-عا، جەرگىلىكتى جەلى بويىنشا – 99%-عا جەتكەنىن حابارلادى. جول قۇرىلىسى ساپاسىن باعالاۋ بويىنشا جۇرگىزىلگەن جۇمىستاردىڭ ناتيجەسىندە مەردىگەر كومپانيالار ءوز قاراجاتى ەسەبىنەن جالپى سوماسى 3،9 ملرد تەڭگەگە جۇمىستاردى قايتادان جاسادى. بيىل نىسانداردى 100% ساراپتامادان وتكىزۋ جانە جول-قۇرىلىس ماتەريالدارىنىڭ 10 مىڭ ۇلگىسىنە سىناق جۇرگىزۋ جوسپارلانىپ وتىر.
جاساندى ينتەللەكت تەحنولوگيالارىن ەنگىزۋ بويىنشا اۆتوجولداردى دياگنوستيكالاۋ بويىنشا جۇمىس بەلسەندى جۇرگىزىلۋدە، اۆتوماتتاندىرىلعان باقىلاۋعا جانە ەلەكتروندىق كولىك قۇجاتتارىنا اۋقىمدى كوشۋ جۇزەگە اسىرىلۋدا.
پرەمەر-مينيستر جول سالاسى الەۋەتىن ارتتىرۋ جونىندەگى جۇمىستى جانداندىرۋ قاجەتتىگىن اتاپ ءوتتى.