الماتىنىڭ تۋريزم سالاسى قارقىندى دامىپ كەلەدى. 2025 جىلدىڭ العاشقى توقسانىندا مەگاپوليسكە 496 944 ادام كەلگەن، بۇل وتكەن جىلدىڭ وسى كەزەڭىمەن سالىستىرعاندا 4،9% كوپ. بۇل تۋرالى قالانىڭ تۋريزم باسقارماسى حابارلادى.
تۋريستەر سانى شەتەلدىك مەيماندار ەسەبىنەن ءوسىپ وتىر. ولار ءبىر جىل ىشىندە 18%-عا كوبەيىپ، 2024 جىلدىڭ العاشقى توقسانىنداعى 122 859 ادامنىڭ ورنىنا 145 058 ادامعا جەتتى.
تۋريستەر لەگىنىڭ ارتۋى ءۇندىستان (+73،4%)، جۇڭگو (+39،3%)، تۇركيا (+24%)، بىرىككەن اراب امىرلىكتەرى (+47،8%) جانە مالايزيا (ءوسىم - 5،7 ەسە) سىندى ەلدەردەن بايقالدى.
الماتىنىڭ تۋريستىك الەۋەتىنە دەگەن قىزىعۋشىلىقتى الەمدىك دەڭگەيدەگى ايتۋلى رەيتينگتەر دە راستايدى. 2025 جىلى قالا CNN ارناسىنىڭ نۇسقاسى بويىنشا ۇزدىك تۋريستىك باعىتتار قاتارىنا ەنسە، Booking.com نۇسقاسى بويىنشا جىلدىڭ ەڭ تانىمال باعىتتارىنىڭ ءبىرى رەتىندە اتالدى.
الماتى الەمدىك تۋريستىك كەڭىستىكتە ەرەكشە ورنى بار قالا رەتىندە تانىتىپ كەلەدى. تۇمسا تابيعات، تەرەڭ تاريحي-مادەني مۇرا، زاماناۋي ينفراقۇرىلىم مەن قازاق حالقىنىڭ قوناقجايلىعى بۇل شاھاردى وزگەلەردەن دارالاپ كورسەتەدى.