الماتى اكىمى دارحان ساتىبالدى ۇلكەن الماتى شاتقالىندا تۋريستىك جانە ينفراقۇرىلىمدىق جوبالاردىڭ جۇزەگە اسۋ بارىسىمەن تانىستى.
جۇمىس ساپارى اياسىندا قالا باسشىسى كوپشىلىككە تانىمال تۋريستىك سوقپاقتاردىڭ ءبىرى – «الما-اراسان» رادون بۇلاعىنا باراتىن مارشرۋتتى جاڭعىرتۋ بارىسىن تەكسەردى. دارحان ساتىبالدى تاۋ باۋرايىن نىعايتۋ، كوپىرلەردى قايتا جاڭارتۋ، ءقاۋىپسىز جابىندىلاردى توسەۋ، باسپالداقتار مەن باقىلاۋ الاڭدارىن ورناتۋ جونىندەگى جۇمىستارمەن تانىستى. جارتاستاردان تاس قۇلاۋ ءقاۋپىن ازايتۋ جانە تۋريستەردىڭ قاۋىپسىزدىگىن قامتاماسىز ەتۋ بويىنشا زاماناۋي شەشىمدەردى ەنگىزۋگە ەرەكشە نازار اۋدارىلدى.
«ءبىز الماتى-اراسانعا باراتىن جولدى جاڭارتىپ، ونى قولجەتىمدى، ءقاۋىپسىز ەتىپ جاتىرمىز. تاس قۇلاعان جەرلەردەگى جارتاستاردى نىعايتىپ، وتكەلدەردى جاڭارتىپ، ەكوسوقپاقتار مەن كورروزياعا قارسى قۇرىلىمدار ورناتىپ، شاتقال اتاۋىنا سىلتەمە جاسايتىن ناۆيگاسيالىق بەلگىلەردى ورناتامىز. جۇمىس 12 مامىردا باستالدى، شىلدە ايىنىڭ ورتاسىندا اياقتالادى»، - دەدى تۋريزم باسقارماسىنىڭ باسشىسى عاليا توقسەيىتوۆا.
ساپار بارىسىندا BI Group كومپانياسى جۇزەگە اسىرىپ جاتقان «باقىت سوقپاعى 2025 جىل» جوباسىنىڭ ءۇشىنشى كەزەڭى تانىستىرىلدى. جوبا اياسىندا تاۋلى ايماقتارداعى جاڭا باعىتتار كوركەيتىلىپ، دەمالىسقا ارنالعان كۇركەلەر، ناۆيگاسيالىق اقپاراتتىق تاقتالار، سانيتارلىق توراپتار مەن شولۋ الاڭدارى ورناتىلادى. سونداي-اق كومپانيا حالىقارالىق ستاندارتتارعا ساي سۋ مەن ەلەكتر قۋاتىن قاجەت ەتپەيتىن ەكودارەتحانالار ورناتۋدى جوسپارلاپ وتىر.
نىسانداردى ارالاۋ «ايۋساي» ۆيزيت ورتالىعىندا جالعاستى. بۇل ورتالىق ەكولوگيالىق قۇرىلىس قاعيدالارى نەگىزىندە سالىنعان. مۇندا اكىمگە ۇلكەن الماتى كولىنە اپاراتىن اۆتوجولدى جوندەۋ جوسپارى جانە نەگىزگى تۋريستىك نىساندارعا كولىكپەن قولجەتىمدىلىكتى ارتتىرۋ جونىندەگى تۇجىرىمداما تانىستىرىلدى.
ساپار سوڭىندا دارحان ساتىبالدى تۋريستىك مارشرۋتتاردىڭ بارىنشا ءقاۋىپسىز بولۋىن، قالا تۇرعىندارى مەن قوناقتارىنىڭ جايلى دەمالۋىنا جاعداي جاسالۋىن، سونداي-اق، تۋريستىك ينفراقۇرىلىمدى قالانىڭ كولىك جۇيەسىنە ءتيىمدى بىرىكتىرۋدى تاپسىردى