الماتى حايۋاناتتار باعى پايدالانىلعان تابيعي جاڭا جىلدىق شىرشالاردى قابىلداۋعا ارنالعان ەكولوگيالىق اكسيانى باستادى، - دەپ حابارلايدى Aqshamnews.kz.
بۇل باستاما جاسىل جەلەكتەرگە «ەكىنشى ءومىر» سىيلاپ، جانۋارلاردىڭ ءال-اۋقاتىن جاقسارتۋعا ۇلەس قوسۋعا مۇمكىندىك بەرەدى.
جاڭا جىل مەرەكەلەرى اياقتالعاننان كەيىن قالا تۇرعىندارى ءتىرى شىرشالاردى قوقىسقا تاستاماي، ولاردى الماتى حايۋاناتتار باعىنا تاپسىرا الادى. قابىلدانعان اعاشتار جانۋارلار قورشاۋىنا قويىلىپ، ولاردىڭ تىرشىلىك ورتاسىن بايىتۋ ماقساتىندا پايدالانىلادى.
شىرشالار بۇعى، ەلىك، قوداس، قابان جانە باسقا دا جانۋارلاردىڭ قورشاۋىندا قولدانىلادى. جانۋارلار جاڭا زاتتارعا ەرەكشە قىزىعۋشىلىق تانىتىپ، شىرشالاردى يىسكەپ، ءدامىن تاتىپ، تارتىپ، سەكىرىپ، بۇتاعىنا سۇيكەنىپ، قابىعىمەن وينايدى. بۇل ولاردىڭ قيمىل-قوزعالىسىن ارتتىرىپ، كۇيزەلىستى ازايتىپ، كۇندەلىكتى تىرشىلىگىن ارلەندىرە تۇسەدى.
اتالعان اكسيا ەكولوگيالىق شارا عانا ەمەس، بۇل ادامداردى تابيعاتقا جاناشىرلىقپەن قاراۋعا، سانالى تۇتىنۋعا شاقىراتىن تاعىلىمدى باستاما.
شىرشالاردى قابىلداۋ ورنى:
الماتى حايۋاناتتار باعىنىڭ قىزمەتتىك كىرەبەرىسى
الماتى قالاسى، ورمانوۆ كوشەسى، 64
قابىلداۋ مەرزىمى: 8-18 قاڭتار
تەك تابيعي، ءتىرى شىرشالار قابىلدانادى
بايلانىس تەلەفونى: 8 (701) 676-85-85
الماتى زوولوگيالىق پاركى قالا تۇرعىندارى مەن قوناقتارىن اكسياعا قاتىسۋعا، جانۋارلار مەن قورشاعان ورتانى قورعاۋعا ۇلەس قوسۋعا شاقىرادى.