2024 جىلى ءىىم «باقىلاناتىن جەتكىزۋ» ءادىسىن پايدالانا وتىرىپ، 21 ءىس-شارا وتكىزدى.
ونىڭ ىشىندە 19 ءىس-شارا ىشكى، ال ەكى ءىس-شارا سىرتقى بولدى، دەپ حابارلايدى aqshamnews.kz Polisia.kz-كە سىلتەمە جاساپ.
ناتيجەسىندە ەسىرتكى جەتكىزۋدىڭ 94 ىشكى ارناسى انىقتالدى، ونىڭ 55ء-ى سينتەتيكالىق زاتتارمەن بايلانىستى. 137 كەلىدەن استام سينتەتيكالىق ەسىرتكى جانە ەكى توننا پرەكۋرسور تاركىلەندى.
– بۇل باعىتتا حالىقارالىق ىنتىماقتاستىق ماڭىزعا يە. قىرعىز رەسپۋبليكاسىنىڭ ىىم-مەن بىرلەسىپ، جامبىل وبلىسىندا ەكى سىرتقى وپەراسيا جۇرگىزىلدى، بۇل ەكى ترانسۇلتتىق ەسىرتكى كانالىنىڭ جولىن كەسۋگە مۇمكىندىك بەردى. 16 كەلىدەن استام گاشيش تاركىلەندى. بۇل باعىتتاعى جۇمىس جالعاسۋدا، – دەدى ءىىم ەسىرتكى قىلمىسىنا قارسى ءىس-قيمىل كوميتەتى ءتوراعاسىنىڭ ورىنباسارى دانيار مەيىرحان.
وتكەن جىلى بارلىعى سەگىز مىڭعا جۋىق ەسىرتكى قۇقىق بۇزۋشىلىعى انىقتالدى، ونىڭ ىشىندە 3 430-ى قىلمىس. قىلمىستىق توپ قۇرۋ جانە ونى باسقارۋ بويىنشا 13 قىلمىستىق ءىس قوزعالدى. ەسىرتكى زاتتارىن تۇتىنۋ ءۇشىن پريتون ۇيىمداستىرۋ جانە ۇستاۋ بويىنشا جەتى دەرەك انىقتالدى. 21 توننادان استام ەسىرتكى زاتتارى تاركىلەندى، ونىڭ ىشىندە 547 كگ سينتەتيكا، 2،5 كگ گەروين، 10 توننادان استام ماريحۋانا، 572 كگ گاشيش. 63 ەسىرتكى زەرتحاناسى جويىلدى. ەسىرتكى تاراتۋعا قاتىستى اقپاراتتى قامتيتىن 7400 ينتەرنەت-رەسۋرس انىقتالدى.