الماتى قالاسىنىڭ تۇرعىندارى ەكستراكورپورالدى ۇرىقتاندىرۋ (ەكۇ) باعدارلاماسىن بەلسەندى تۇردە پايدالانىپ كەلەدى.
بۇل پروسەدۋرا تولىقتاي مىندەتتى الەۋمەتتىك مەديسينالىق ساقتاندىرۋ (ءمامس) جۇيەسى ارقىلى قارجىلاندىرىلادى. 2024 جىلى عانا «اڭساعان ءسابي» باعدارلاماسى اياسىندا جالپى قۇنى 3،9 ملرد تەڭگەگە 3229 پروسەدۋرا جۇرگىزىلدى، دەپ حابارلايدى aqshamnews.kz.
بۇل تۋرالى وڭىرلىك كوممۋنيكاسيالار قىزمەتىندە وتكەن باسپا ءسوز كونفەرەنسياسىندا مەديسينالىق ساقتاندىرۋ قورىنىڭ الماتى قالالىق فيليالىنىڭ ديرەكتورى ءىلياس مۇحامەدجان مالىمدەدى.
سپيكەر ءسوز بارىسىندا ەكۇ پروسەدۋراسىن ءتيىمدى پايدالانعان ازاماتشا تۋرالى مىسال كەلتىردى. 37 جاستاعى كاسىپكەر ايەل ءبىر جىل ىشىندە 71 400 تەڭگە كولەمىندە ساقتاندىرۋ جارناسىن تولەگەن. ال وعان جاسالعان ەكۇ پروسەدۋراسىنىڭ قۇنى — 1،2 ملن تەڭگە بولعان، بۇل — ونىڭ تولەگەن جارناسىنان 17 ەسە جوعارى. سونىمەن قاتار، وعان دياگنوستيكالىق قىزمەتتەر دە تەگىن كورسەتىلگەن.
بۇدان بولەك، قور باسشىسى الماتىلىقتاردىڭ كونسۋلتاتيۆتىك-دياگنوستيكالىق قىزمەتتەردى بەلسەندى پايدالانىپ جۇرگەنىن اتاپ ءوتتى. 2024 جىلى 102 مىڭنان استام كت جانە مرت زەرتتەۋلەرى جۇرگىزىلىپ، ولاردىڭ جالپى قۇنى 1،6 ملرد تەڭگەنى قۇرادى. بۇرىن بۇل قىزمەت تۇرلەرى تەك الەۋمەتتىك وسال ساناتتاعى ازاماتتارعا عانا قولجەتىمدى بولسا، ءقازىر بارلىق ساقتاندىرىلعان ازاماتتار پايدالانا الادى.
«ءمامس جۇيەسىنىڭ ارتىقشىلىعى — تابىس دەڭگەيىنە قاراماستان تولىققاندى مەديسينالىق كومەك پەن دياگنوستيكا الۋعا مۇمكىندىك بەرۋىندە»، — دەپ تۇيىندەدى سپيكەر.