الماتى قالاسىنداعى راديوەلەكترونيكا جانە بايلانىس اسكەري-ينجەنەرلىك ينستيتۋتىندا مەرزىمدى اسكەري قىزمەتكە شاقىرىلعان 130-عا جۋىق سارباز اسكەري انت قابىلدادى، دەپ حابارلايدى aqshamnews.kz
ونىڭ ىشىندە ەلۋ سارباز وسى ينستيتۋتتىڭ كۇزەت روتاسىندا اسكەري بورىشتارىن وتەسە، قالعاندارى اقپان ايىندا اۋە شابۋىلىنا قارسى قورعانىس اسكەرلەرىنىڭ ءارتۇرلى اسكەري بولىمدەرىنە جونەلتىلمەك. وعان دەيىن جاس جاۋىنگەرلەر كىشى ماماندىق بويىنشا دايارلىق كۋرسىنان وتەدى.
بۇل ازاماتتار اسكەر قاتارىنا قىزىلوردا، جەتىسۋ، الماتى وبلىستارىنان جانە الماتى قالاسىنان شاقىرىلعان. انت قابىلداۋ كۇنىنە دەيىن ولار جاس جاۋىنگەرلەر كۋرسىنان ءساتتى ءوتىپ، ساپتىق دايىندىقتى مەڭگەردى، اسكەري جارعىلاردى وقىپ، قارۋدى قولدانۋ داعدىلارىن ۇيرەندى.
– وتان الدىنداعى بورىشىمدى وتەيمىن دەپ ءوزىم شەشىم قابىلدادىم. سەبەبى ءار جىگىت بۇل جولدان ءوتۋى كەرەك دەپ سانايمىن. اسكەر ءبىزدى شىڭدايدى، مىنەزىمىزدى قالىپتاستىرادى، بۇل مەنىڭ بولاشاقتا ناعىز تۇلعا بولىپ قالىپتاسۋىما ءوز سەپتىگىن تيگىزەتىنىنە سەنەمىن، – دەپ اتاپ ءوتيى الماتى قالاسىنان شاقىرىلعان مەرزىمدى اسكەري قىزمەتشى ءمادي زاكىر.
سالتاناتتى شارا ساربازداردىڭ اسكەري قولما-قول ۇرىس تەحنيكاسىن كورسەتىپ، اسكەري وركەستردىڭ سۇيەمەلدەۋىمەن سالتاناتتى تۇردە ساپ تۇزەپ وتۋىمەن اياقتالدى. بۇل ءسات اتا-انالارى مەن تۋىستارىنا بالالارى ءۇشىن زور ماقتانىش پەن قۋانىش سەزىمىن سىيلادى، كوڭىلدەرىن بوساتتى.
اسكەري انت قابىلداۋ راسىمىنەن كەيىن تۋىس-تۋعاندارى ءۇشىن ينستيتۋتتىڭ وقۋ ورتالىعىنا ەكسكۋرسيا ۇيىمداستىرىلدى. اتا-انالار كازارما، اسحانا جانە باسقا دا نىسانداردى ارالاپ، كومانديرلەرگە وزدەرىن تولعاندىرعان سۇراقتارىن قويىپ، وعان جاۋاپ الدى.
