بىلتىر شەتەلدىك تۋريستەر سانى 2،8 ەسەگە ءوستى
الماتى ءماسليحاتى قالاداعى شەتەلدىكتەر ءۇشىن تۋريستىك جارنا مولشەرلەمەسىن بەكىتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى اكىمىنىڭ ورىنباسارى الىشەر ءابدىقادىروۆ ءوز بايانداماسىندا قالالارداعى، اۋداندارداعى جاتاقحانالاردى، قوناق ۇيلەردى، جالعا بەرىلەتىن تۇرعىن ۇيلەردى قوسپاعاندا، ورنالاستىرۋ ورىندارىندا بولعان ءاربىر تاۋلىك ءۇشىن تۋريستىك جارنا الىناتىنىن جانە وعان تۇرۋ قۇنى كىرمەيتىنىن ايتتى.
«وپەراتورلار (قوناق ۇيلەر) جارنا الۋدى جۇزەگە اسىرادى، ولار شەتەلدىكتەردى الىناتىن تۋريستىك جارنا تۋرالى حاباردار ەتەدى، ەسەپكە الادى جانە جەرگىلىكتى بيۋدجەتكە اۋدارادى. ق ر بيۋدجەت كودەكسىنە سايكەس شەتەلدىكتەر ءۇشىن تۋريستىك جارنا مەملەكەتتىك بيۋدجەتكە سالىقتىق ەمەس تۇسىمدەر بولىپ تابىلادى»،- دەدى ول.
قالا اكىمىنىڭ ورىنباسارى شەتەلدىكتەر ءۇشىن تۋريستىك جارنا مولشەرلەمەلەرىن ەسەپتەۋ وتكەن كۇنتىزبەلىك جىلدىڭ ستاتيستيكالىق دەرەكتەرى نەگىزىندە جۇرگىزىلەتىنىن اتاپ ءوتتى.
«وتكەن جىلدىڭ ۇقساس كەزەڭىمەن سالىستىرعاندا شەتەلدىك تۋريستەر سانى جيىرما پايىز جانە ودان كوپ بولعان جاعدايدا بولۋ قۇنىنىڭ 5 (بەس) پايىزى كولەمىندە مولشەرلەمە قولدانىلادى. ورنالاستىرۋ ورىندارىندا شەتەلدىك تۋريستەردىڭ سانى ازايعان جاعدايدا شەتەلدىكتەر ءۇشىن تۋريستىك جارنا مولشەرلەمەسىنىڭ كولەمى تۇزەتىلەدى»،- دەدى الىشەر ءابدىقادىروۆ.
2021 جىلدىڭ التى ايىندا الماتىدا قىزمەت كورسەتىلگەن شەتەلدىك تۋريستەر سانى 54 مىڭنان استى. بىلتىر شەتەلدىك تۋريستەر سانى 2،8 ەسەگە، ياعني ياعني 97 مىڭ ادامعا ءوستى.
«2023 جىلى شەتەلدىك تۋريستەردىڭ سانى 400 مىڭ ادامنان اسادى دەپ بولجانۋدا جانە تۋريستىك جارنادان تۇسەتىن اقشا قاراجاتىنىڭ بولجامدى مولشەرى – 2 ملرد 342 ملن تەڭگە. تۋريستىك جارنادان تۇسكەن قاراجات جەرگىلىكتى بيۋدجەتتەن ءتۋريزمدى دامىتۋعا باعىتتالاتىن بولادى»،- دەدى ول.
بۇعان دەيىن 2023 جىلدان باستاپ الماتىعا كەلگەن شەتەلدىكتەردەن تۋريستىك جارنا الىناتىنى تۋرالى جازعان بولاتىنبىز.