وتكەن جىلى عىلىم جانە جوعارى ءبىلىم ءمينيسترى ساياسات نۇربەك وقۋ اقىسىن 2-3%-عا تولەۋگە ۇزاق مەرزىمدى جەڭىلدىكتى نەسيەلەر بەرۋ جوسپارى تۋرالى ايتقان بولاتىن.
مينيسترلiكتە جوعارى بىلىمگە قول جەتىمدىلىكتى كەڭەيتۋ اياسىندا زاڭنامالىق دەڭگەيدە «ءبىلىم بەرۋ نەسيەسى» ۇعىمى ەنگىزىلگەنىن ءتۇسىندىردى. بۇل تەرمين ستۋدەنتتەردىڭ وقۋىن اياقتاعاننان كەيىن ونى وتەۋ مۇمكىندىگىمەن وقۋ اقىسىن تولەۋگە نەسيە الۋىن بىلدىرەدى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
«پرەزيدەنت قاسىم-جومارت توقايەۆتىڭ تاپسىرماسى بويىنشا ءبىلىم الۋشىلارعا ۇلتتىق ءبىرىڭعاي تەستىلەۋ (ۇبت) ناتيجەلەرىن، الەۋمەتتىك جاعدايدى، عىلىمي (شىعارماشىلىق) جەتىستىكتەردى ەسكەرە وتىرىپ، جوعارى بىلىمگە اقى تولەۋ ءۇشىن نىسانالى اقشا سوماسىنىڭ بەلگىلى ءبىر ۇلەسىن الۋدى قامتاماسىز ەتۋ ماقساتىندا سارالانعان گرانت ەنگىزۋ ماسەلەسى پىسىقتالۋدا»، - دەپ اتاپ ءوتتى مينيسترلىكتە.
نەسيەلەۋدى ىسكە قوسۋ قولدانىستاعى زاڭنامادا قاجەتتى نورمالار قابىلدانعاننان كەيىن 2024 جىلدان باستاپ كۇتىلەدى.
وعان ءبىلىم بەرۋ گرانتىنىڭ يەگەرى بولماعان تالاپكەرلەر ۇمىتكەر بولا الادى. وسىلايشا، ولار مەملەكەت كەپىلدىگىمەن نەسيە الىپ، وقۋىنا اقى تولەي الادى.
سونداي-اق، قارىزدى وتەۋ مەرزىمدەرىن بەلگىلەۋ كەزىندە قارىز الۋشىلاردىڭ جەكەلەگەن ساناتتارى (جەتىم بالالار، اتا-اناسىنىڭ قامقورلىعىنسىز قالعان بالالار) ەسكەرىلەتىن بولادى.
«تومەن پايىزدىق مولشەرلەمەمەن قازاقستان ازاماتتارىنا مەملەكەتتىك ءبىلىم بەرۋ نەسيەلەرىن بەرۋ تۋرالى ماسەلە پىسىقتالۋدا»، - دەلىنگەن رەسمي جاۋاپتا.
جەڭىلدىكتى نەسيەلەۋدى ىسكە اسىرۋ قارجى اگەنتىن تارتا وتىرىپ، ەكىنشى دەڭگەيدەگى بانكتەر ارقىلى جۇزەگە اسىرىلادى.
سونىمەن قاتار، مينيسترلىك ءبىلىم بەرۋ گرانتتارىن سارالاۋدىڭ بىرنەشە مودەلىن قاراستىرۋدا.