2022 جىل الەمنىڭ ەڭ داۋلەتتى 500 ادامى ءۇشىن قولايسىز جىل بولدى. ولار 1،4 تريلليون دوللار قاراجاتىنان ايىرىلدى، دەپ حابارلايدى Almaty-akshamy.kz Inbusiness.kz-كە سىلتەمە جاساپ.
كەڭ تارالعان ينفلياسيا جانە ورتالىق بانك ساياساتىنىڭ اگرەسسيۆتى قاتاڭداتىلۋى سالدارىنان بيىلعى جىل پاندەميا كەزىندە جەڭىل اقشاعا كەنەلگەن ءبىرقاتار ميللياردەر توبى ءۇشىن قولايسىز بولدى. بيىل يلون ماسك، دجەفف بەزوس، چانپەن چجاو جانە مارك سۋكەربەرگ وزدەرىنىڭ جيىنتىق بايلىعىنان شامامەن 392 ميلليارد دوللار جوعالتتى، دەلىنگەن Bloomberg جۇرگىزگەن زەرتتەۋدە. دەگەنمەن، وسى جىل داۋلەتتى وزگە تۇلعالار ءۇشىن جامان بولعان جوق: ءۇندىستاندىق گاۋتام اداني ءال-اۋقات يندەكسى بويىنشا بيلل گەيتس پەن ۋوررەن باففەتتەن اسىپ ءتۇستى. كوحي مەن مارس كلانى سياقتى الەمدەگى ەڭ باي وتباسىلار دا ءوز بايلىعىن ارتتىردى.
Bloomberg باسىلىمى كاپيتالىنان ايىرىلعان داۋلەتتىلەردىڭ وقيعالارىن كەلتىردى. سول كەزدە الەمدەگى ەڭ باي ادام بولعان يلون ماسك Tesla-نى جەتكىزۋمەن قيىندىق تۋىپ جاتقانىن ەسكەرتكەننەن كەيىن 27 قاڭتاردا 25،8 ميلليارد دوللارىنان ايىرىلعان.
شىلدەدە قىتايلىق يان حۋەيياننىڭ داۋلەتى قىتايداعى مۇلىك داعدارىسى اياسىندا جەتى ايدا ەكى ەسە ازايىپ، ازيانىڭ ەڭ باي ايەلى تيتۋلىنان ايىرىلدى. يان 2005 جىلى اكەسىنەن مۇراگەرلىككە العان Country Garden Holdings قۇرىلىس كومپانياسى سوڭعى جىلدارى تۇرعىن ءۇي قۇرىلىسىنىڭ ايتارلىقتاي ارتۋىنان قوماقتى تابىس تاپقان. ءبىراق بەيجىڭنىڭ تۇرعىن ءۇي باعاسىن وسىرمەۋ ساياساتى مەن قحر ءتوراعاسى سي ءسزينپيننىڭ قاتاڭ شاراسى جوبالاردى كەشەۋىلدەتىپ، يپوتەكاعا العان ءۇي يەلەرى توقتاپ تۇرعان قۇرىلىس ءۇشىن اقشا تولەۋدەن باس تارتقان. سالدارىنان يان حۋەييان داۋلەتى 2022 جىلى ەكى ەسە ازايدى.
قىركۇيەكتىڭ ورتاسىندا مارك سۋكەربەرگتىڭ جەكە كاپيتالى 71 ميلليارد دوللارعا قۇلدىراپ، Meta Platforms اكسيالارىنىڭ باعاسىنىڭ تومەندەۋىنە اكەلىپ سوقتىرعان مەتاعالام مەن سالانىڭ قۇلدىراۋىنا بايلانىستى كاپيتالىنىڭ 57% جوعالتتى. ءبىر جىل ىشىندە سۋكەربەرگ Bloomberg داۋلەت يندەكسىندە 19 پوزيسيا جوعالتىپ، 2022 جىلدى 25ء-شى ورىندا اياقتادى.
"كوۆيد-ميللياردەرلەردىڭ" داۋلەتى دە ازايا ءتۇستى. ولار 2020-2021 جىلدارى ۆاكسينادان (ستەفان بانسەل، Modern ۆاكسيناسى)، پايدالانىلعان اۆتوكولىكتەردەن (Carvana يەلەرى ەرني گارسيا II مەن ەرني گارسيا III)، ينتەرنەت-دۇكەندەردەن (Coupang يەسى بوم كيم) جانە Zoom-نان (ەريك يۋان) پايدا تاپقان. 58 ميللياردەردىڭ داۋلەتى "پاندەميا سالالارىنا" بايلانىستى بىردەن كوتەرىلگەن، ەندى ولاردىڭ اكتيۆىنىڭ باعاسى قازاندا 58 % تومەندەدى.
بانكمان-فريدتىڭ FTح كريپتوۆاليۋتا بيرجاسى قاراشا ايىندا ونىڭ يمپەرياسىنىڭ بالانسىنىڭ تۇراقسىزدىعى جانە تاۋەكەلدەرگە باقىلاۋدىڭ جوقتىعى انىقتالعاننان كەيىن قۇلدىرادى. 30 جاستاعى كاسىپكەردىڭ 16 ميلليارد دوللارلىق بايلىعى ءبىر اپتادان جويىلدى. ونىڭ داۋلەتى بۇعان دەيىن 26 ميلليارد دوللار دەپ باعالاندى.
73 جاستاعى بەرنارد ارنو، فرانسيا ءسان سالاسىنىڭ ماگناتى، LVMH كورپوراسياسىنىڭ يەسى يلون ماسكتى الەمدەگى ەڭ باي ادامدار تىزىمىنەن ىعىستىردى.