2023 جىلدىڭ 1 قاڭتارىنان باستاپ Qoldau پلاتفورماسىنىڭ فەرمەرلەرگە سۋبسيديا بەرۋگە ارنالعان سەرۆيسى قىزمەتىن توقتاتادى، دەپ حابارلايدى Almaty-akshamy.kz Inform.kz-كە سىلتەمە جاساپ.
اتالعان سەرۆيستىڭ قىزمەتىن توقتاتۋ سۋبسيديالاۋدىڭ ءبىرىڭعاي مەملەكەتتىك اقپاراتتىق جۇيەسىن ىسكە قوسۋمەن جانە Qoldau سيفرلىق پلاتفورماسىنىڭ الدىنا قويىلعان جاڭا، اۋقىمدى مىندەتتەرمەن بايلانىستى.
«سۋبسيديالاۋدىڭ دەرەكتەر بازاسى قابىلداۋ-تاپسىرۋ اكتىسى ارقىلى ق ر اۋىل شارۋاشىلىعى مينيسترلىگىنە بەرىلدى. قارجى ينستيتۋتتارى – اگروونەركاسىپ كەشەنىن قارجىلاندىرۋ نارىعىنا قاتىسۋشىلاردىڭ ءوتىنىشى بويىنشا ولارعا، سونداي-اق سۋبسيديالاۋ سەرۆيسىنىڭ تاريحي دەرەكتەرى ۇسىنىلدى. بۇل سۋبسيديالاۋ سالاسىنىڭ ءبىرىڭعاي مەملەكەتتىك اقپاراتتىق جۇيەسىنە (بماج) اۋىرتپالىقسىز كوشۋىنە كەپىلدىك بەرەدى.
ال Qoldau پلاتفورماسى مەملەكەتتىك شەكاراداعى وتكىزۋ بەكەتتەرىن سيفرلاندىرۋ، باعالاۋ، اۋديتورلىق جانە بۋحگالتەرلىك قىزمەتتى سيفرلاندىرۋ، مەملەكەتتىك كىرىستەر ورگاندارىنىڭ مونيتورينگى ءۇشىن استىقتى قاداعالاۋ سالاسى، بانكروتتىق راسىمدەرىن سيفرلاندىرۋ، مەملەكەتتىك مۇلىكتى ءتيىمدى پايدالانۋ مونيتورينگى جانە ەل باسشىلىعىنىڭ تاپسىرمالارى شەڭبەرىندە باسقا دا اۋقىمدى جوبالاردى ىسكە اسىرا وتىرىپ، جۇمىسىن جالعاستىرا بەرەدى»، - دەلىنگەن حابارلامادا.
ايتا كەتەيىك، Qoldau سۋبسيديالاۋ سەرۆيسى ارقىلى 2018 جىلى پيلوتتىق رەجيمدە ىسكە قوسىلعان ساتتەن باستاپ بۇگىنگە دەيىن 700 ملرد تەڭگەگە جۋىق سۋبسيديا تولەندى (بۇگىنگى باعام بويىنشا 1،5 ملرد اقش دوللارى). سۋبسيديا الۋشىلاردىڭ قاتارىندا 61 مىڭنان استام شارۋا قوجالىقتارى مەن كومپانيالار بار. ينۆەستيسيالىق سۋبسيديالاۋ كولەمى شامامەن 312 ملرد تەڭگەنى قۇرايدى. Qoldau سەرۆيسى ارقىلى 95 ميللياردقا جۋىق تەڭگە ءۇش باعىت بويىنشا تولەندى. اتاپ ايتقاندا، كرەديتتەر مەن ليزينگ بويىنشا پايىزدىق مولشەرلەمەنى سۋبسيديالاۋ، اۋىل شارۋاشىلىعى ونىمدەرىن قايتا وڭدەۋدى قولداۋ جانە اگرارلىق سالا كاسىپورىندارىن قارجىلىق ساۋىقتىرۋ.
Qoldau سۋبسيديالاۋ سەرۆيسى بيۋدجەت قاراجاتىنسىز مەملەكەتتىك-جەكەشەلىك ارىپتەستىك نەگىزىندە جاسالىپ، ەنگىزىلدى. وسىلايشا اگروونەركاسىپ كەشەنىن سۋبسيديالاۋ اشىقتىعى قامتاماسىز ەتىلدى. سيفرلاندىرۋدىڭ بۇل جوباسى قۇقىق قورعاۋ ورگاندارىنا مەملەكەتتىك قارجىنى جىمقىرۋ فاكتىلەرىن انىقتاۋعا مۇمكىندىك بەردى. سەبەبى سەرۆيس سيفرلاندىرىلعان كەز كەلگەن ارالاسۋدى كورسەتىپ وتىرادى. وسىلايشا مونيتورينگ جۇرگىزۋ كەزىندە فيسكالدىق ورگانداردىڭ جۇمىسىن جەڭىلدەتتى.