قىمبات دارى-دارمەكپەن قامتاماسىز ەتۋ دەڭگەيى اۋىل تۇرعىندارى اراسىندا قالا تۇرعىندارىمەن سالىستىرعاندا ەكى ەسە از.
بۇل تۋرالى پارلامەنت ماجىلىسىندەگى ۇكىمەت ساعاتىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اۋىلداعى دەنساۋلىق ساقتاۋ سالاسىندا ءبىرقاتار پروبلەما بار. ديناميكالىق باقىلاۋ ساپاسىنىڭ تومەندىگى، كونسۋلتاسيالىق-دياگنوستيكالىق قىزمەتتەردىڭ جەتكىلىكسىز بولۋى بايقالىپ وتىر. سونىمەن قاتار، سوزىلمالى اۋرۋلارى بار پاسيەنتتەردى قىمبات دارى-دارمەكپەن قامتاماسىز ەتۋ اۋىل تۇرعىندارى اراسىندا قالا تۇرعىندارىمەن سالىستىرعاندا 2 ەسە از»، - دەدى ا. عينيات اۋىلداعى دەنساۋلىق ساقتاۋ ماسەلەسىن تالقالۋعا ارنالعان ۇكىمەت ساعاتىندا.
وسى ورايدا ول ءبىرقاتار اۋىلدا ءدارىحانا پۋنكتتەرى جوق ەكەنىن ايتتى.
«اۋىلداعى كادرلىق قامتاماسىز ەتۋگە تالداۋ جىرگىزىلىپ، 1 700-دەن استام مەديسينا قىزمەتكەرىنىڭ، ونىڭ ىشىندە 1000-نان استام دارىگەردىڭ تاپشىلىعى انىقتالدى. مەملەكەت باسشىسىنىڭ تاپسىرماسى بويىنشا اۋىلداعى نىساندارعا ينۆەنتاريزاسيا جۇرگىزىلدى. ناتيجەسىندە 200-دەن استام ەلدى مەكەندە مەديسينالىق نىسان جوق، سونداي-اق 400-گە جۋىق اۋىلدا مەديسينالىق نىسان جالعا الىنعان نەمەسە اپاتتىق، بەيىمدەلگەن عيماراتتاردا ورنالاسقان» - دەدى مينيستر.
ونىڭ سوزىنە قاراعاندا، اۋىلدىق مەديسينالىق-سانيتارلىق العاشقى كومەككە قاتىستى مەديسينالىق ينفراقۇرىلىمنىڭ توزۋى 50 پايىزدان اسىپ وتىر.