ەلىمىزدىڭ 3 وبلىسىنىڭ كەي اۋداندارىندا پيلوتتىق جوبا باستالىپ كەتتى.
بۇل تۋرالى دەنساۋلىق ساقتاۋ ءمينيسترى اجار عينيات مالىمدەدى، دەپ حابارلايدى Almaty-akshamy.kz.
قازاقستاننىڭ بارلىق اۋىلىندا 20 قازاننان باستاپ پروفيلاكتيكالىق تەكسەرىس جۇرگىزىلەدى.
مينيستر كوروناۆيرۋس پاندەمياسى كەزىندە شەكتەۋ شارالارىنا بايلانىستى اۋىل تۇرعىندارىنا مامانداندىرىلعان مەديسينالىق كومەكتىڭ قولجەتىمدىلىگى تومەندەگەنىن اتاپ ءوتتى.
«سوعان بايلانىستى اۋرۋلاردى ەرتە انىقتاۋ جانە ۋاقتىلى ەمدەۋ ءۇشىن اۋقىمدى پروفيلاكتيكالىق قاراپ-تەكسەرۋلەر ەنگىزىلۋدە. ءبىز تەك پروفيلاكتيكالىق تەكسەرىس جۇرگىزىپ قانا قويماي، ءاربىر ازاماتتىڭ دەنساۋلىعىن باقىلاپ وتىرامىز. 20 قازاننان باستاپ اۋىلداردا پروفيلاكتيكالىق مەديسينالىق تەكسەرىستەر بۇكىل ەل بويىنشا جۇرگىزىلەدى»، - دەدى ا.عينيات ماجىلىستەگى ۇكىمەت ساعاتىندا.
ايتۋىنشا، قاراعاندى وبلىسىنىڭ اباي اۋدانىندا، اقمولا وبلىسىنىڭ ارشالى اۋدانىندا جانە الماتى وبلىسىنىڭ ەڭبەكشىقازاق اۋدانىندا پيلوتتىق جوبا باستالىپ كەتتى.
جىنىستىق، جاس قۇرامىن، حالىقتىڭ دەنساۋلىعىن تالداۋدى ەسكەرە وتىرىپ، نىسانالى توپ پەن اۋىل تۇرعىندارىن سكرينينگتەۋ قىزمەتتەرىنىڭ تىزبەسى كەڭەيتىلدى.
اتاپ ايتقاندا، 18 جاسقا دەيىن – «بالالار»، 18 جاستان 29 جاسقا دەيىن –«جاستار»، 30 جاستان 44 جاسقا دەيىن – «ەڭبەك-1»، 45 جاستان 65 جاسقا دەيىن – «ەڭبەك-2»، 66 جاستان اسقاندار – «زەينەتكەر» ساناتتارى.
«پروفيلاكتيكالىق قاراپ-تەكسەرۋلەر جۇرەك-قان-تامىرلار جۇيەسى اۋرۋلارىنىڭ، قانت ديابەتىنىڭ، اسقازان مەن بۇيرەكتىڭ سوزىلمالى اۋرۋلارىنىڭ ەرتە كەزەڭدەرىن انىقتاۋعا باعىتتالعان»، - دەدى مينيستر.
18 جاسقا دەيىنگى بالالار ءۇشىن 1 جاس، 3 جاس، 6 جاس جانە 14 جاس ارالىعىنداعى زەرتحانالىق زەرتتەۋلەردىڭ قوسىمشا جالپى كلينيكالىق ادىستەرى ەنگىزىلدى.
قالالىق جانە اۋىلدىق پاسيەنتتەردى امبۋلاتوريالىق دەڭگەيدە تەڭ دارەجەدە تەگىن قامتاماسىز ەتۋ ءۇشىن مىناداي جاعدايلار جاسالعان:
- دارىلىك زاتتار امبۋلاتوريالىق دارى-دارمەكپەن قامتاماسىز ەتۋدىڭ ءبىرىڭعاي تىزبەسى بويىنشا بەرىلەدى؛
- اۋىلدا دارىگەر بولماعان جاعدايدا، فەلدشەر تەگىن رەسەپت جازىپ بەرۋگە قۇقىلى؛
- ءدارىحانا جوق اۋىلداردا دارىلىك زاتتاردى مەديسينا قىزمەتكەرى مەديسينالىق-سانيتارلىق العاشقى كومەك وبەكتىلەرى ارقىلى، سونداي-اق جىلجىمالى ءدارىحانا پۋنكتەرى ارقىلى تەگىن جىبەرەدى.