«قازاقستان» تەلەراديوكورپوراسياسىنىڭ «Balapan» تەلەارناسى «شوقان. قاشقاريا ساپارى» اتتى تولىقمەتراجدى انيماسيالىق ءفيلمىن ۇسىنادى، دەپ حابارلايدى aqshamnews.kz
شوقان ءۋاليحانوۆتىڭ 190 جىلدىعىنا وراي تۇسىرىلگەن تۋىندى عالىمنىڭ ايگىلى قاشقاريا ەكسپەديسياسىنا نەگىزدەلگەن. ءمۋلتفيلمنىڭ وقيعاسى 1858 جىلى شوقان ءۋاليحانوۆتىڭ قاشقارياعا جاساعان ساياحاتىنان باستاۋ الادى. سيۋجەت جەلىسى بويىنشا 8 جاسار ازات سيقىرلى ۋاقىت كومپاسى ارقىلى وتكەنگە تاپ بولىپ، قاشقارياعا باعىتتالعان كەرۋەنگە قوسىلادى. وسىلايشا، قازىرگى زامانعى كەيىپكەر مەن ۇلى زەرتتەۋشىنىڭ تاعدىرى توعىسىپ، كورەرمەندەردى تاريحي شىندىق پەن فەنتەزي ەلەمەنتتەرى ۇيلەسكەن شىتىرمان وقيعاعا جەتەلەيدى.
«شوقان. قاشقاريا ساپارى» جوباسى – كورپوراسيانىڭ تولىقمەتراجدى انيماسيالىق فيلم جاساۋداعى العاشقى تاجىريبەسى. بۇل جوبانى تولىققاندى بيوگرافيالىق تۋىندى دەپ قاراستىرۋعا بولمايدى. فيلمدە عالىمنىڭ تەك قاشقارياعا ساپارى نەگىزگە الىنعان. 10 سەريادان تۇراتىن انيماسيالىق جوبانى تولىقمەترلى فيلم فورماتىندا قايتا ازىرلەۋ – وندىرىستىك تۇرعىدان كۇردەلى پروسەسس جانە جوبا از قاراجاتپەن جۇزەگە اسىرىلدى. ياعني، بيۋدجەت تەك ەفير ءۇشىن دايىندالعان انيماسيالىق سەريالعا ءبولىندى. دەگەنمەن، كورپوراسيا ءوز باستاماسىمەن بالالار اراسىندا تاريحي تۇلعالارىمىزدى تانۋعا دەگەن قىزىعۋشىلىقتى ارتتىرۋ، قازاق تىلىندەگى بالالار كونتەنتىنىڭ كەڭىرەك تارالۋىن قامتۋ ماقساتىندا جوبانى ۇلكەن ەكرانعا شىعارىپ وتىر. بۇدان بولەك، بيىل جىل سوڭىنا دەيىن «Balapan» تەلەارناسىنىڭ ەفيرىندە جوعارى رەيتينگكە يە بولعان «جەلاياق»، «توقتى مەن سەركە» مۋلتفيلمدەرىنىڭ تولىقمەترلى نۇسقالارىن پروكاتقا شىعارۋدى جوسپارلاپ وتىرمىز»، - دەدى «قازاقستان» رترك» باسقارما ءتورايىمى ءلاززات تانىسباي.
انيماسيالىق فيلم 20 ناۋرىزدان باستاپ كوكتەمگى كانيكۋل مەرزىمىندە قازاقستاننىڭ بارلىق قالالارىنداعى كينوتەاترلار جەلىسىندە كورسەتىلەدى.