قازاقستان جۇلدىزدارى الماتىلىقتاردى كورىسۋ كۇنى – امال مەرەكەسىمەن قۇتتىقتادى
بۇگىن ەكى مىڭنان استام الماتىلىق مەن قالا قوناقتارى «كوك-توبەگە» جينالىپ، ءبىر-بىرىن كوكتەمنىڭ كەلۋىمەن قۇتتىقتادى، ناۋرىزناما ونكۇندىگىنىڭ العاشقى كۇنى – كورىسۋ مەرەكەسىنە وراي ۇيىمداستىرىلعان تەاترلاندىرىلعان كونسەرتتى تاماشالادى.
ساحنا تورىندە ەلىمىزدىڭ سۇيىسپەنشىلىگى مەن ماحابباتىنا بولەنگەن، اتى اڭىزعا اينالعىن روزا رىمبايەۆا، جانار ايجانوۆا، ايگۇل قوسانوۆا، «جىگىتتەر» توبى، الما امانجولوۆا، سونداي-اق «الاتاۋ» ءداستۇرلى ونەر تەاترىنىڭ ارتىستەرى ونەر كورسەتتى. مارتەبەلى مەيماندار قاتارىندا بەلگىلى جازۋشىلار، مادەنيەتتانۋشىلار، ەڭبەك سىڭىرگەن ونەر قايراتكەرلەرى جانە ءبىرقاتار زيالى قاۋىم وكىلى بولدى.
«قادىرمەندى قاۋىم، بۇگىن قازاقستانىمىزدا ۇلكەن مەرەكە – ناۋرىزناما باستالدى. قازاقتىڭ جاڭا جىلى، كوكتەم كەلدى. سوندىقتان بىر-بىرىمىزبەنەن كورىسىپ، امانداسىپ، بىر-بىرىمىزگە جاقسى تىلەك ايتىپ جاتىرمىز. مەن ءوزىمدى باقىتتى ءانشىمىن دەپ سانايمىن، سەبەبى مەنىڭ «ناۋرىز-دۋمان» ءانىم وسى مەرەكەدە مىندەتتى تۇردە شىرقالادى. تەك قانا ءبىر ساحنادا ەمەس، بۇكىل قازاقستاندا، ءتىپتى مەكتەپ وقۋشىلارىنا دەيىن، اۋىل-ايماقتاردا، اۋدانداردا مەنىڭ وسى ءانىم شىرقالىپ جاتادى. سوندىقتان مەن – وسى ناۋرىزدى جىرلايتىن باقىتتى ءانشىمىن. ەلىمىزگە بيىلعى ناۋرىز باق-بەرەكە اكەلسىن، بىرلىك الىپ كەلسىن. قازاقستانىمىز جىلدان جىلعا كوركەيە بەرسىن!»، – دەدى قازاقستاننىڭ ەڭبەك ەرى، حالىق ءارتيسى روزا رىمبايەۆا.
الماتىلىقتارعا ەرەكشە سىي رەتىندە «كوك-توبەدەگى» اسپالى جول بۇگىن ساعات 9:00-دەن 13:00-گە دەيىن تەگىن جۇمىس ىستەدى. سونىڭ ارقاسىندا مەرەكەلىك ءىس-شاراعا كەلگەن كورەرمەن قاتارى كوپ بولدى.
«بۇگىن كورىسۋ كۇنى «كوك-توبەنىڭ» تورىندە تويلانىپ جاتىر. قۇرمەتتى الماتىلىقتار، بارشاڭىزدى امال مەرەكەسىمەن شىن جۇرەكتەن قۇتتىقتايمىن! بۇل امال كۇنىنىڭ تاربيەلىك ءمانى زور. ۇلكەنگە قۇرمەت، كىشىگە ىزەت كورسەتىپ، اعايىن-تۋىس اراسىنداعى بايلانىستى ۇزبەۋگە باعىتتايتىن ماعىناسى زور مەرەكە. قازاقتا «باتالى ەل ازباس» دەگەن ءسوز بار. سول سەبەپتى بۇگىنگى امال كۇنىندە بىر-بىرىمىزگە جاقسى تىلەكتەرىمىزدى ايتىپ، باتالى بولايىق! امال كۇنى قۇتتى بولسىن، اعايىن!»، – دەدى قازاقستاننىڭ ەڭبەك سىڭىرگەن قايراتكەرى، تانىمال ارتيست جانار ايجانوۆا.
ايتا كەتەيىك، الماتىدا 14-23 ناۋرىز ارالىعىندا وتەتىن ناۋرىزناما ونكۇندىگى اياسىندا 100-دەن استام ءتۇرلى ءىس-شارا جوسپارلانعان. ولاردىڭ ىشىندە كورمەلەر، سپەكتاكلدەر، سپورتتىق جارىستار، تانىمال ارتيستەردىڭ قاتىسۋىمەن وتەتىن كونسەرتتەر جانە باسقا دا قىزىقتى ءىس-شارالار بار. اۋقىمدى ءىس-شارالاردىڭ اڭداتپالارى الماتى قالاسىنىڭ مادەنيەت باسقارماسىنىڭ @almatymadeniet پاراقشاسىندا جانە الماتى قالاسى اكىمدىگىنىڭ رەسمي ينتەرنەت-رەسۋرستارىندا جاريالانادى.
