الماتىنىڭ الاتاۋ اۋدانىنداعى 20 كوشەدە 1،1 مىڭنان استام شام جانە 8 كم كابەل اۋىستىرىلدى، دەپ حابارلايدى almaty-akshamy.kz
2024 جىلى الماتىنىڭ الاتاۋ اۋدانىنداعى 284 كوشەدە سىرتقى جارىقتاندىرۋ جەلىلەرى قايتا جاڭارتىلىپ جاتىر. 2023 جىلى «اجق» اق ينۆەستيسيالىق باعدارلاماسى اياسىندا 230 كم ەلەكترمەن جابدىقتاۋ جەلىلەرى مەن 93 ترانسفورماتورلىق قوسالقى ستانسيالارعا جوندەۋ جۇرگىزىلدى. 2024 جىلى 275 كم ەلەكترمەن جابدىقتاۋ جەلىلەرى مەن 73 قوسالقى ستانسيا جوندەلەدى. بۇل تۋرالى الماتى اكىمى ەربولات دوسايەۆ الاتاۋ اۋدانىنىڭ تۇرعىندارىمەن ەسەپتىك كەزدەسۋ بارىسىندا حابارلادى.
قالا باسشىسى اتاپ وتكەندەي، راحات-مادەنيەت شاعىن اۋدانىنداعى ەلەكتر جارىعىنىڭ ءجيى ءوشۋى ماسەلەسى شەشىلەدى، مۇندا دايىندالعان جوباعا سايكەس جاڭا ەلەكتر جۇيەسىنە 2 مىڭنان استام ءۇي قوسىلادى. جاڭا ەلەكتر جەلىلەرىن سالۋ وسى جىلدىڭ ماۋسىمىندا باستالىپ، 2025 جىلدىڭ مامىر ايىندا اياقتالادى.
«ساپالى سىرتقى جارىقتاندىرۋ اۋدانىمىزداعى وزەكتى ماسەلەلەردىڭ ءبىرى بولىپ وتىر»، - دەدى ەربولات دوسايەۆ ەسەپتى كەزدەسۋگە قاتىسۋشىلارعا ارناعان سوزىندە.
2023 جىلى 20 كوشەنىڭ 1135 جارىق شامدارى مەن 8 كم كابەل اۋىستىرىلدى (شامداردىڭ جالپى سانى - 16 423). «كوشەلەردى شاممەن تولىق جارىقتاندىرۋ ءۇشىن اۋدان اكىمدىگى 284 كوشەدە سىرتقى جارىقتاندىرۋ جەلىلەرىن سالۋ جانە رەكونسترۋكسيالاۋ بويىنشا جوبالىق-سمەتالىق قۇجاتتاردى دايىنداۋ باستالدى. قۇرىلىس-مونتاجداۋ جۇمىستارى وسى جىلدىڭ سوڭىندا اياقتالادى»، - دەپ ءسوزىن تۇيىندەدى ەربولات دوسايەۆ.