حالىقتان تۇسكەن ەسكەرتۋلەردى نازارعا الىپ، قوردىڭ ءىت ماماندارى سايتتى جاڭارتىپ جاتىر
اutonesie.kz پورتالىنا تىركەلگەن 761 ادامنىڭ 500-دەن استامى كولىك الىپ ۇلگەرگەن. ونەركاسىپتى دامىتۋ قورى ءقازىر سايتتى جەتىلدىرىپ جاتىر، دەپ حابارلايدى Almaty-akshamy.kz Almaty.tv-گە سىلتەمە جاساپ.
جەڭىلدەتىلگەن اۆتونەسيەنى جۇرت قاتتى كۇتىپ-اق ءجۇر. الايدا پورتال ارقىلى الۋ مۇمكىن ەكەنىنە كۇمانمەن قارايدى. سەبەبى 18 سەكۋندتا 761 ادام تىركەلسە، ەندىگىسىندە الگى سەكۋندتار بىرنەشە ەسەگە قىسقارۋى مۇمكىن عوي. ال قاس قاعىم ساتتە ەلەكتروندى سيفرلى قولتاڭبانى اشۋ اناۋ-مىناۋ ادامنىڭ قولىنان كەلمەيدى. كەيبىرى پورتالعا تىركەلۋدەن كۇدەرىن ءۇزىپ، پايىزى جوعارى نەسيەمەن ماشينا ساتىپ الىپتى.
«مەن ماشينا الامىن دەپ كوردىم. ءبىراق تىزىمگە ىلىككەن جوقپىن. ودان كەيىن اقشاما ساتىپ الدىم»، – دەدى تۇرعىن.
«18 سەكۋندتا 760 ادام العانىنا سەنەم. ءقازىر ينتەرنەتكە بايلانىستى عوي. بۇل دا 1 مينۋتتان ارتىق بولمايدى-اۋ دەپ ويلايمىن»، – دەدى تۇرعىن.
«18 سەكۋندتا جابىلىپ قالدى دەگەن مۇمكىن ەمەس، ءسىز وعان ءوزىڭىز سەنەسىز بە؟ ءوزىڭ بارىپ، العاشقى جارنانى تولەپ، العان دۇرىس سياقتى عوي»، – دەدى تۇرعىن.
وسى جەڭىلدەتىلگەن اۆتونەسيە باعدارلاماسىنا پورتال دايىنداپ، 761 ادامنىڭ تىركەلۋىنە مۇمكىندىك بەرگەن ونەركاسىپتى دامىتۋ قورى ءقازىر سايتتى جەتىلدىرىپ جاتىر. ياعني، حالىقتان تۇسكەن ەسكەرتۋلەردى نازارعا الىپ، قوردىڭ ءىت ماماندارى ونى جاڭارتىپ جاتىر. ءلايلا توقمۇحانبەتوۆانىڭ ايتۋىنشا، 6 اقپان كۇنى سايتقا العاشقى ازامات 10:00:01 سەكۋندتا تىركەلگەن. فيزيكالىق تۇرعىدا بۇل مۇمكىن ەمەس بولىپ كورىنەدى، الايدا، قور وكىلدەرى ولاي ويلامايدى.
«6 اقپان كۇنى پلاتفورما ىسكە اسىرىلعان كەزدە ءبىر ۋاقىتتا 125 مىڭ ادام تىركەلۋگە نيەت بىلدىرەدى. سوندىقتان ساعات 10:00-دا جانە 1 سەكۋندتا تىركەلىپ بولادى»، – دەدى «ونەركاسىپتى دامىتۋ قورى» اق قوعاممەن بايلانىس قىزمەتىنىڭ باسشىسى ءلايلا توقمۇحانبەتوۆا.
اتالعان باعدارلاماعا ءوتىنىم بەرۋ ءۇشىن پورتال اي سايىن اشىلىپ، وعان كەم دەگەندە 100 ادام قاتىسادى دەپ بولجانعان بولاتىن. الايدا، ەندىگى پۋلعا ءوتىنىم قابىلداۋ قاشان باستالاتىنى بەلگىسىز. ونەركاسىپتى دامىتۋ قورى پورتالدىڭ اشىلاتىن ۋاقىتىن الدىن-الا حابارلايتىن بولادى.
ايتا كەتەيىن، ءار ءوتىنىش 60 كۇن جارامدى. ەگەر وسى ۋاقىتتا پايدالانىلماسا، كەلەسى ايداعى پۋلعا اۆتوماتتى تۇردە وتەدى. ەسكە سالايىن، جەڭىلدەتىلگەن اۆتونەسيە ارقىلى الاتىن كولىكتىڭ قۇنى 15 ميلليون تەڭگەدەن اسپاۋى كەرەك. نەسيە سوماسى 10 ميلليون تەڭگە. باستاپقى جارنا تولەمەيسىز. قارجىلاندىرۋ مەرزىمى - 10 جىل. سىياقى مولشەرلەمەسى - 4 پايىز. وسىنداي ءتيىمدى شارتتارمەن ماشينا العىڭىز كەلسە، الدىمەن autonesie.kz سايتىنا تىركەلۋ قاجەت.