ۇلىبريتانيا ۇكىمەتى 16 جاسقا تولماعان بالالارعا الەۋمەتتىك جەلىلەردى پايدالانۋعا تىيىم سالۋى مۇمكىن.
بيلىك وسىلايشا جاس جەتكىنشەكتەردى عالامتورداعى زياندى كونتەنتتەن قورعاعىسى كەلەدى. ۇكىمەت بۇعان دەيىن ينتەرنەتتەگى قاۋىپسىزدىك تۋرالى زاڭ قابىلداپ، ونى بۇزعان كومپانيالارعا ءىرى كولەمدە ايىپپۇل سالۋدى ۇيعارعانى بەلگىلى. بالالارعا زياندى كونتەنت كورسەتكەنى ءۇشىن پلاتفورمالار تابىسىنىڭ 10 پايىزىن تولەۋگە مىندەتتەلدى. ءبىراق بۇل ازدىق ەتەدى دەپ شەشكەن بيلىك ەندى 16 جاسقا تولماعاندارعا الەۋمەتتىك جەلىلەردى پايدالانۋعا شەكتەۋ قويماق، دەپ حابارلايدى اlmaty-akshamy.kz 24.kz-كە سىلتەمە جاساپ.
ەندريۋ گريففيت، ۇلىبريتانيانىڭ عىلىم ءمينيسترى: - ءقازىر وسى ماسەلە بويىنشا اقىلداسىپ جاتىرمىز. بولاشاقتا بالالار الەۋمەتتىك جەلىلەردى پايدالانباس بۇرىن اتا-اناسىنىڭ رۇقساتى سۇرالاتىن بولادى.
ينستاگرام مەن پينتەرەست جەلىلەرىنەن زياندى كونتەنت كورىپ، وز-وزىنە قول سالعان 14 جاسار موللي راسسەلدىڭ وتباسى قايىرىمدىلىق قورىن اشقان بولاتىن. قور قىزمەتكەرلەرىنىڭ پىكىرىنشە، تەلە-راديو ەفيرى مەن ينتەرنەتتەگى اقپاراتتى قاداعالاۋمەن اينالىساتىن وفكوم اگەنتتىگىنە قوسىمشا وكىلەتتىكتەر بەرىلۋ كەرەك.
بيبون كيدرون، قوعام بەلسەندىسى: - الەۋمەتتىك جەلىلەر تاۋەلدىلىك تۋعىزىپ، شىندىققا جاناسپايتىن جاساندى الەمگە جەتەلەيدى. ول جاسوسپىرىمدەر وتىراتىن ورىن ەمەس. سوندىقتان رەتتەۋشى ورگاننىڭ قىزمەتىن كۇشەيتۋ كەرەك.
ينتەرنەتتەگى قاۋىپسىزدىك تۋرالى زاڭ قوعامدا ءالى قىزۋ تالقىلانىپ جاتىر. ماڭىزدى قۇجات بالالاردى قورعاعانىمەن ازاماتتاردىڭ جەكە ومىرىنە قول سۇعادى دەيدى ساراپشىلار. اسىرەسە، حات الماسقان كەزدە قۇپيالىلىق ساقتالمايدى-مىس. ياعني، ۆاتساپ، ۆايبەر پايدالانۋشىلار بىر-بىرىنە ءقاۋىپتى كونتەنت جىبەرمەۋى ءۇشىن جازبالارى قاداعالاناتىن بولادى.
كير نۋتي، اقپاراتتىق يننوۆاسيالار ورتالىعىنىڭ اعا ساراپشىسى: - شيفرلاۋ – ول اقپاراتتى قۇپيا كودقا تۇرلەندىرۋ ءادىسى. ەكى ادام حات الماسىپ جاتقاندا، ءتىپتى، ونلاين سەرۆيس تە ولاردىڭ اڭگىمەسىنەن بەيحابار بولادى. بۇل ءسوز بوستاندىعى مەن جەكە باس قۇپيالىعى ءۇشىن كەرەك دۇنيە. ال جاڭا زاڭعا سايكەس مەسسەندجەرلەر كونتەنتتى قاداعالاپ، جۇرتتىڭ اڭگىمەسىن اڭدىپ وتىرماق.
قايىرىمدىلىق ۇيىمدارى مەن بەلسەندىلەر 2017 جىلدان بەرى عالامتورداعى ءقاۋىپتى كونتەنتپەن قاتاڭ كۇرەس جۇرگىزۋگە شاقىرىپ كەلەدى. ارنايى زاڭ وتكەن كۇزدە قابىلدانباس بۇرىن وتە ۇزاق تەكسەرۋدەن وتكەن بولاتىن. بالالاردى قورعاۋعا ارنالعان قايىرىمدىلىق ۇيىمىنىڭ پىكىرىنشە، سوڭعى 6 جىل ىشىندە عالامتوردا بالالار ومىرىنە ءقاۋىپ توندىرگەن 35 مىڭعا جۋىق قىلمىس تىركەلگەن.