ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتى 2024 جىلى وتكىزگەن تەكسەرىستىڭ قورىتىندىسىن شىعاردى.
بارلىعى 18 وڭىردە 342 ۇيىم تەكسەرىلدى، ونىڭ ىشىندە 120-سى جەرگىلىكتى جەردە جانە 58ء-ى جوسپاردان تىس باقىلاۋ اياسىندا تەكسەرىلدى، دەپ حابارلايدى aqshamnews.kz.
تەكسەرۋلەر ورتا ءبىلىم بەرۋ، دەنساۋلىق ساقتاۋ، الەۋمەتتىك قورعاۋ مەكەمەلەرىن، سونىڭ ىشىندە جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان ۇيىمداردى، سونداي-اق ەرەكشە ءبىلىم بەرۋ قاجەتتىلىكتەرى بار بالالارعا ارنالعان مامانداندىرىلعان مەكەمەلەردى قامتىدى.
انىقتالعان زاڭ بۇزۋشىلىقتار ناتيجەسىندە 24 اكىمشىلىك حاتتاما تولتىرىلىپ، 2 ميلليون تەڭگەدەن استام ايىپپۇل سالىندى، 133 ۇيعارىم شىعارىلىپ، ولاردى جويۋ بويىنشا 164 ۇسىنىم جولداندى. بۇدان بولەك، 78 لاۋازىمدى تۇلعا تارتىپتىك جاۋاپكەرشىلىككە تارتىلدى.
«تەكسەرۋلەر جەرگىلىكتى اتقارۋشى ورگاندار تاراپىنان بالالاردىڭ قۇقىقتارىن قورعاۋ سالاسىندا زاڭ بۇزۋشىلىقتاردىڭ بار ەكەنىن كورسەتتى. بۇل زاڭنامانىڭ ساقتالۋىن باقىلاۋدى كۇشەيتۋدىڭ جانە ولاردىڭ ءبىلىم الۋى مەن تاربيەلەنۋى ءۇشىن ءقاۋىپسىز ورتا قالىپتاستىرۋدىڭ ماڭىزدىلىعىن ايعاقتايدى. جۇيەنىڭ بارلىق قاتىسۋشىلارى بالالاردىڭ قۇقىقتارى مەن ءال-اۋقاتى ءۇشىن جاۋاپتى، ال ولاردىڭ باستى مىندەتى – ءاربىر بالانى قورعاۋ، قولداۋ جانە ولارعا تەڭ مۇمكىندىكتەردى قامتاماسىز ەتۋ»، – دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
قابىلدانعان شارالاردىڭ ناتيجەسىندە ق ر وقۋ-اعارتۋ مينيسترلىگى 1500-دەن استام بالانىڭ كەلەسى قۇقىقتارىن قالپىنا كەلتىرۋدى قامتاماسىز ەتتى:
• تۇرعىن ءۇي قۇقىعى – جەتىم بالالار مەن اتا-اناسىنىڭ قامقورلىعىنسىز قالعان بالالار ءۇشىن تۇرعىن ۇيگە مەنشىك نەمەسە پايدالانۋ قۇقىعىن ساقتاۋ.
• مۇلىكتىك قۇقىقتار – كامەلەتكە تولماعانداردىڭ اكتيۆتەرى مەن زاڭدى مۇددەلەرىن قورعاۋ.
• وتباسىندا ءومىر ءسۇرۋ جانە تاربيەلەنۋ قۇقىعى – بالالاردىڭ مۇددەلەرىن شەكتەيتىن زاڭسىز شەشىمدەردىڭ الدىن الۋ.
• ءبىلىم الۋ قۇقىعى – ءتيىستى دەڭگەيدەگى بىلىمگە، سونىڭ ىشىندە قوسىمشا بىلىمگە قولجەتىمدىلىكتى قامتاماسىز ەتۋ.
• پسيحولوگيالىق-پەداگوگيكالىق قولداۋ – بالالاردىڭ ۇيلەسىمدى دامۋىنا ىقپال ەتەتىن ءبىلىم بەرۋ ورتاسىندا سۇيەمەلدەۋ.
• پسيحولوگيالىق ءال-اۋقات – ءبىلىم الۋشىلاردىڭ ەموسيونالدىق جانە مەنتالدىق دەنساۋلىعىن نىعايتۋعا باعىتتالعان شارالار.
قوسىمشا تۇردە بالالاردىڭ دەنساۋلىعىنا ىقتيمال قاۋىپتەردىڭ الدىن الۋ ماقساتىندا ءبىلىم بەرۋ مەكەمەلەرىندە تاماقتانۋدى ۇيىمداستىرۋ بويىنشا ۇسىنىمدار بەرىلدى. بۇل ناتيجەلەر بالالاردىڭ قۇقىقتارىن قورعاۋ جانە باقىلاۋ تەتىكتەرىن كۇشەيتۋ بويىنشا جۇيەلى جۇمىستى جالعاستىرۋدىڭ ماڭىزدىلىعىن اتاپ كورسەتەدى.