الماتىدا ەسىرتكى جارنامالاۋدىڭ جاڭا ءتاسىلى انىقتالدى

قۇقىق قورعاۋ ورگاندارىنىڭ مالىمەتىنشە، 28 جاستاعى ازامات شاعىن نەسيە الۋعا ارنالعان جاپسىرمالار تاراتۋمەن اينالىسقان.

الايدا QR-كودتى سكانەرلەگەن كەزدە قولدانۋشىلار نەسيە بەرۋ سەرۆيسىنە ەمەس، ەسىرتكى ساتۋمەن اينالىساتىن ينتەرنەت-رەسۋرسقا كىرىپ كەتكەن، دەپ حابارلايدى aqshamnews.kz.

- كۇدىكتى ءوزىنىڭ قىلمىستىق ارەكەتىن مويىندادى. ونىڭ مىندەتى – قوعامدىق كولىك ايالدامالارىنا، بيلبوردتارعا، باعانالارعا پاراقشالار جاپسىرۋ بولعان. ول قىزمەتى ءۇشىن تولەمدى كريپتوۆاليۋتا تۇرىندە الىپ وتىرعان. قازىرگى تاڭدا ۇستالعان ازاماتتىڭ ارەكەتىنە قۇقىقتىق باعا بەرىلۋدە. سونداي-اق ونىڭ جۇمىس بەرۋشىلەرى انىقتالىپ جاتىر، – دەدى جەتىسۋ اۋداندىق پوليسيا باسقارماسىنىڭ باستىعى جانىبەك شىناسىلوۆ. 

كۇدىكتى ۋاقىتشا ۇستاۋ يزولياتورىنا قامالدى. اتالعان فاكتى بويىنشا ق ر قىلمىستىق كودەكسىنىڭ 299-1-بابى (ەسىرتكى قۇرالدارىنىڭ نەمەسە پسيحوتروپتىق زاتتاردىڭ جارناماسى نەمەسە زاڭسىز ناسيحاتى) بويىنشا قىلمىستىق ءىس قوزعالدى. تەرگەۋ مۇددەسىنە بايلانىستى ءىستىڭ وزگە ءمان-جايى جاريا ەتىلمەيدى. قازاقستان رەسپۋبليكاسىنىڭ كونستيتۋسياسىنا جانە قىلمىستىق كودەكسىنە سايكەس، كەز كەلگەن ازاماتتىڭ كىناسى سوت شەشىمى زاڭدى كۇشىنە ەنگەنگە دەيىن دالەلدەنبەگەن بولىپ سانالادى.