وزبەكستاندا تۇراتىن ەڭ قارت تۇرعىننىڭ جاسى رەسمي تۇردە راستالدى، - دەپ حابارلايدى Aqshamnews.kz.
ادىلەت مينيسترلىگىنىڭ دەرەگىنشە، فەرعانا وبلىسىنىڭ بۋۆايدا اۋدانىنداعى «قوراقۇم» ماحاللاسىندا تۇراتىن حۋۆايدو ۋماروۆا (توشماتوۆا) 1895 جىلدىڭ 1 قاڭتارىندا دۇنيەگە كەلگەن.
بۇل فاكت قوقاندتاعى ازاماتتىق ىستەر جونىندەگى اۋدانارالىق سوتتىڭ كوشپەلى وتىرىسىندا انىقتالعان. تەكسەرۋ قارت انانىڭ ۇيىندە ءوتتى.
ەندى تۋىستارى حۋۆايدو ۋماروۆانىڭ ەسىمىن گيننەس رەكوردتار كىتابىنا ەنگىزۋ ءۇشىن ءوتىنىش بەرۋدى جوسپارلاپ وتىر. بۇعان دەيىن مۇنداي مۇمكىندىك بولماعان، سەبەبى 1999 جىلى بەرىلگەن ءتولقۇجاتىندا تۋعان كۇنى كورسەتىلمەپتى.
مينيسترلىك رەسمي تۇردە جاستىعىن راستاعان سوڭ، 130 جاسقا تولعان حۋۆايدو ۋماروۆانىڭ الەمدەگى ەڭ قارت ادام رەتىندە مويىندالۋىنا مۇمكىندىك تۋدى.