مەملەكەت باسشىسىنىڭ تاپسىرماسى بويىنشا باستاماشىلىق جاسالعان «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسىنىڭ شەڭبەرىندە جوسپارلانعان 655 مەديسينالىق-سانيتاريالىق العاشقى كومەك نىساندارىنىڭ 540-ى سالىندى، تاعى 115ء-ى اعىمداعى جىلدىڭ سوڭىنا دەيىن اياقتالادى، - دەپ حابارلايدى Aqshamnews.kz.
بۇل تۋرالى وكق بريفينگىندە ق ر دەنساۋلىق ساقتاۋ ۆيسە-مينيسترى تيمۋر مۇراتوۆ حاباردار ەتتى.
بۇل رەتتە 200-گە جۋىق اۋىلدىق ەلدى مەكەندە العاش رەت جاڭا مەديسينالىق مەكەمەلەر پايدا بولدى جانە مەديسينالىق كومەك اۋىل تۇرعىندارى ءۇشىن قولجەتىمدى بولدى.
«346 نىسان ەسكىرگەن عيماراتتاردىڭ ورنىنا، 194 نىسان بۇرىن مەديسينالىق ينفراقۇرىلىممەن قامتىلماعان اۋىلداردا سالىندى. جوبا بويىنشا بارلىعى 260 مەديسينالىق پۋنكت، 235 فاپ جانە 160 دارىگەرلىك امبۋلاتوريا سالىنادى»، - دەدى ت.مۇراتوۆ.
ءاربىر نىساننىڭ جوباسى ءبىرىڭعاي ستاندارتتار بويىنشا ازىرلەنەدى جانە وعان تەلەمەديسينا، فيزيوتەراپيا كابينەتتەرى، ءدارىحانا پۋنكتتەرى، ەمدىك دەنە شىنىقتىرۋ زالدارى كىرەدى. ولار ءۇشىن جابدىقتاردىڭ 70%-دان استامىن وتاندىق كاسىپورىندار وندىرەدى.
سونىمەن قاتار 32 اۋداندىق ورتالىق اۋرۋحانا، 12 جۇمىس ىستەپ تۇرعان كوپبەيىندى اۋداندىق ورتالىق اۋرۋحانا جانە 20 جۇمىس ىستەپ تۇرعان اۋداندىق ورتالىق اۋرۋحانا جاڭعىرتىلادى.
بۇگىنگى تاڭدا 10 كاوا قۇرىلىس-مونتاجداۋ جۇمىستارىن اياقتادى، قالعاندارى 2026 جىلدىڭ سوڭىنا دەيىن قۇرىلىس-مونتاجداۋ جۇمىستارىن اياقتايدى.
ولاردىڭ بازاسىندا ينسۋلت جانە جۇرەك ورتالىقتارى، حيرۋرگيا، تراۆماتولوگيا، وڭالتۋ جانە قارقىندى تەراپيا بولىمشەلەرى اشىلادى. تەمىرتاۋ، بالقاش، جاڭاارقا، ءۇرجار، شۋ، مەركە، تالاس جانە بەينەۋ قالالارىندا سەگىز اۋرۋحانا قايتا قۇرىلدى.
دەنساۋلىق ساقتاۋ ۆيسە-مينيسترى مەديسينالىق كادرلارمەن قامتاماسىز ەتۋ ماسەلەلەرىنە جەكە توقتالدى. ۇلتتىق جوبانىڭ شەڭبەرىندە اۋىلدىق مەديسينالىق ۇيىمداردا جۇمىس ىستەۋ ءۇشىن 1100-دەن استام مامان دايارلاۋ جوسپارلانۋدا.
ۇلتتىق جوبانى ىسكە اسىرۋ كەزەڭىندە اۋىلدىق ۇيىمدارعا 1009 مەديسينا قىزمەتكەرى جىبەرىلدى جانە جۇمىسقا ورنالاستىرىلدى، ونىڭ ىشىندە مساك نىساندارىنا - 55 جالپى پراكتيكا دارىگەرى، 168 ورتا مەديسينا قىزمەتكەرى، اۋداندىق اۋرۋحانالارعا 400-دەن استام بەيىندى دارىگەر جانە 380-دەن استام مەيىرگەر جۇمىسقا ورنالاستى.
اۋىلدىق ەلدى مەكەندەرگە جۇمىس ىستەۋ جانە تۇرۋ ءۇشىن كەلگەن دەنساۋلىق ساقتاۋ ماماندارىنا «ديپلوممەن اۋىلعا!» باعدارلاماسىنىڭ شەڭبەرىندە الەۋمەتتىك قولداۋ شارالارى كورسەتىلەدى.
سونداي-اق مەديسينا قىزمەتكەرلەرىنىڭ مارتەبەسىن ارتتىرۋ ماقساتىندا الەۋمەتتىك كەپىلدىكتەر مەن ىنتالاندىرۋشى تولەمدەر پاكەتى كەڭەيتىلدى.
سونىمەن، 2024 جىلدان باستاپ اۋىلدىق جەرگە جۇمىسقا كەلەتىن اسا تاپشى ماماندىقتاردىڭ مەديسينا قىزمەتكەرلەرىنە 100 ەتج – 8،5 ملن تەڭگە مولشەرىندە ءبىرجولعى اقشالاي تولەمدى كوزدەيتىن نورما ىسكە اسىرىلۋدا.
اتالعان شارالار كەشەنى اۋىل تۇرعىندارى ءۇشىن مەديسينالىق كومەكتىڭ قولجەتىمدىلىگىن ارتتىرۋعا جانە دەنساۋلىق ساقتاۋ جۇيەسىنىڭ كادرلىق الەۋەتىن نىعايتۋعا باعىتتالعان.