قارجىنى قاي ۆاليۋتادا ساقتاعان ءتيىمدى؟

كەيىنگى 6 ايدا تەڭگەمەن ساقتالاتىن دەپوزيتتەردىڭ ۇلەسى 3 پايىز ارتىپ، 71،6 پايىزعا جەتكەن.

بۇل تۋرالى ۇلتتىق ەكونوميكا مينيسترلىگىنىڭ 2023 جىلعى قاڭتار-ماۋسىمداعى الەۋمەتتىك-ەكونوميكالىق دامۋىنىڭ قورىتىندىسىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ. 

مينيسترلىكتىڭ مالىمەتىنە سۇيەنسەك، 1 ماۋسىمداعى جاعداي بويىنشا بانك سەكتورىنىڭ ەكونوميكاعا بەرگەن كرەديتى 25 ترلن 946،8 ملرد تەڭگە بولعان.

ونىڭ ىشىندە زاڭدى تۇلعالارعا بەرىلەتىن كرەديتتەر 10 ترلن 656،7 ملرد تەڭگە بولسا، جەكە تۇلعالارعا بەرىلەتىن كرەديتتەر 15 ترلن 290،1 ملرد تەڭگەگە جەتكەن.

«دەپوزيتتەر 1 ماۋسىمعا 30 629،2 ملرد تەڭگەنى قۇراپ، 2023 جىلدىڭ باسىنا قاراعاندا 1% ازايدى. زاڭدى تۇلعالاردىڭ دەپوزيتى – 3،8%، ياعني، 14 ترلن 711،4 ملرد تەڭگەگە دەيىن تومەندەسە، جەكە تۇلعالاردىڭ دەپوزيتى – 1،7%، ياعني، 15 ترلن 917،8 ملرد تەڭگەگە دەيىن كوبەيدى. ۇلتتىق ۆاليۋتاداعى دەپوزيتتەر ۇلەسى 2022 جىلعى جەلتوقسانداعى 68،4%-تەن 2023 جىلعى مامىردا 71،6%-كە دەيىن ءوستى»، - دەپ جازىلعان انىقتامادا.

سونداي-اق، اينالىستاعى قولما-قول اقشا كولەمى 2023 جىلدىڭ باسىنا قاراعاندا 0،3% ازايىپ، 3 351،4 ملرد تەڭگە بولعان.

«اقشا ماسساسى 1،2%، ياعني، 33 ترلن 890،6 ملرد تەڭگەگە دەيىن تومەندەدى. 2023 جىلعى ماۋسىمدا تەڭگەنىڭ اقش دوللارىنا رەسمي باعامى 1 اقش دوللارىنا 444،85 – 454،13 تەڭگە ارالىعىندا قۇبىلىپ، ورتا ەسەپپەن 2023 جىلعى ماۋسىمدا 1 اقش دوللارىنا 448،5 تەڭگەنى قۇرادى»، - دەپ جازادى مينيسترلىك ساراپشىلارى.