الماتىدا جالعا بەرىلەتىن پاتەرلەر قىمباتتادى

ءۇش بولمەلى پاتەرلەر ماۋسىمدا – 280 000 تەڭگە، تامىزدا – 319 000 تەڭگە

Krisha.kz ساراپشىلارى الماتىدا پاتەر جالداۋ باعاسى ورتا ەسەپپەن 15 پايىزعا وسكەنىن ايتتى، دەپ حابارلايدى Almaty-akshamy.kz Tengrinews.kz –كە سىلتەمە جاساپ.

تامىزدىڭ ەكىنشى اپتاسىنان باستاپ پاتەرلەر باعاسى وسكەنى بايقالعان. 9 تامىزداعى جاعداي بويىنشا، الماتىدا پاتەر جالداۋ باعاسى شارشى مەترىنە 4900 تەڭگە بولدى. كەيىنگى ايلاردا ەكى بولمەلى پاتەر ايتارلىقتاي قىمباتتاعان – باعا 25 پايىزعا ءوستى. ءبىر بولمەلى پاتەرلەر بويىنشا ءوسىم نەبارى 7 پايىز، ال ءۇش بولمەلى پاتەرلەر بويىنشا 14 پايىز بولعان.

وسىلايشا، ماۋسىمدا ءبىر بولمەلى پاتەرلەردى جالعا الۋ ورتاشا ەسەپپەن ايىنا 140 000 تەڭگە بولعان. تامىزدا – 150 000 تەڭگە.
• ەكى بولمەلى پاتەرلەر ماۋسىمدا – 200 000 تەڭگە، تامىزدا – 250 000 تەڭگە،
• ءۇش بولمەلى پاتەرلەر ماۋسىمدا – 280 000 تەڭگە، تامىزدا – 319 000 تەڭگە.
تۇرعىن ءۇي كەشەندەرىندە تامىزدا پاتەر باعاسى شارشى مەترىنە - 5200 تەڭگە.

2015-2020 جىلدارى سالىنعان تۇرعىن ءۇي كەشەنىن جالعا الۋ قۇنى:
• ءبىر بولمەلى پاتەرلەر – 150 000 تەڭگە؛
• ەكى بولمەلى پاتەرلەر – 340 000 تەڭگە؛
• ءۇش بولمەلى پاتەرلەر – 500 000 تەڭگە.

پاتەر جالداۋ اقىسى دا قالا اۋداندارىنا بايلانىستى ايتارلىقتاي ەرەكشەلەنەدى. الاتاۋ، جەتىسۋ، ناۋرىزباي، تۇركسىب، اۋەزوۆ اۋداندارىنداعى ءبىر بولمەلى پاتەرلەر 150 مىڭ تەڭگەگە دەيىن بارادى. المالى، بوستاندىق، مەدەۋ اۋداندارىندا 170 مىڭ تەڭگەدەن باساتالدى. الاتاۋ، جەتىسۋ، ناۋرىزباي، تۇركسىب جانە اۋەزوۆ اۋداندارىندا ەكى بولمەلى پاتەرلەر ايىنا 170-200 مىڭ ارالىعىندا بولادى. المالى، بوستاندىق جانە مەدەۋ اۋداندارىندا ەكى بولمەلى باسپانانىڭ باعاسى 250 مىڭ تەڭگەدەن باستالادى.

قالانىڭ ءار اۋدانىنداعى وزگەرىستەرگە كەلسەك، بوستاندىق، مەدەۋ جانە جەتىسۋ اۋداندارىندا ەكى بولمەلى پاتەرلەردىڭ، مەدەۋ، بوستاندىق جانە اۋەزوۆ اۋداندارىندا ءۇش بولمەلى پاتەرلەردىڭ جالداۋ اقىسى ايتارلىقتاي وسكەن.