قازاقستاننىڭ مۇددەسى ءۇشىن ۇلى وتان سوعىسىنىڭ ارداگەرى 103 جاستاعى فيليپ گۋبانوۆ تا قاراپ قالماي، ءوز تاڭداۋىن جاسادى. ساياسي ناۋقاندا ءاربىر ازاماتتىڭ داۋىسى ماڭىزدى. سوندىقتان، بۇل كۇنى جەتىسۋ اۋدانىنداعى №536 سايلاۋ ۋچاسكەسى كوميسسياسىنىڭ مۇشەلەرى «قۇلاگەر» ىقشاماۋدانىنداعى №53 ۇيدە تۇرىپ جاتقان سوعىس ارداگەرىنىڭ ۇيىنە كەلدى. عاسىردان استام عۇمىر كەشكەن قاريا ءالى دە تىڭ، كوزى قاراقتى، قۇلاعى دا جاقسى ەستيدى.
– مەنىڭ بالالىق شاعىم اشارشىلىق جىلدارىنا تۇسپا-تۇس كەلدى. جوقشىلىقتىڭ اششى ءدامىن تاتتىم. سوناۋ سۇراپىل سوعىسقا قاتىسىپ، وتان ءۇشىن وت كەشتىم. بەيبىت ءومىردىڭ جاقسى كۇندەرى بۇيىردى. بارىنە شۇكىرشىلىك ەتەمىن. تاعدىر ماعان بەيبىت ءومىردى، باقىتتى كۇندەردى كورۋدى بۇيىرتقان ەكەن. سول بەيبىت ءومىردى ساقتاي بىلەيىك! مەنىڭ جاسىم كەلسە دە، ەلىمىزدە بەيبىت ءومىردىڭ بولعانىن قالايمىن! ەلىمىزدىڭ بولاشاعى ءۇشىن داۋىس بەرىپ وتىرمىن! سايلاۋعا قاتىسىپ، داۋىس بەرۋدىڭ ءوزى باقىت قوي. كەلەسى سايلاۋعا دەيىن امان بولايىق!
103 جاستاعى ارداگەر داۋىس بەردى
- اۆتور almaty-akshamy.kz
- 09:54، 19 ناۋرىز 2023
almaty-akshamy.kz