ۆيسە-پرەمەر قانات بوزىمبايەۆ، Kazakhmys Holding ديرەكتورلار كەڭەسىنىڭ ءتوراعاسى ەدۋارد وگاي، Kaspi.kz ديرەكتورلار كەڭەسىنىڭ ءتوراعاسى ۆياچەسلاۆ كيم جانە KAZ Minerals Management باسقارما ءتوراعاسى ەلدار مامەدوۆ سولتۇستىك قازاقستان وبلىسىنا بارىپ، قالپىنا كەلتىرۋ جۇمىستارىمەن تانىستى، سونىمەن قاتار جەرگىلىكتى تۇرعىندارمەن كەزدەستى.
سۋ تاسقىنى باستالعالى وبلىستا 3898 ءۇيدى سۋ باسقان. ساياجاي اۋماعى ايتارلىقتاي زارداپ شەكتى – 6597 ۋچاسكە. وبلىس اكىمدىگىنىڭ مالىمەتىنشە، سۋ باسقان تۇرعىن ۇيلەردىڭ 40%-عا جۋىعى ودان ءارى تۇرۋعا جارامسىز بولۋى مۇمكىن، دەپ حابارلايدى اlmaty-akshamy.kz.
ءۇيسىز قالعاندار ۋاقىتشا جاتاقحاناعا ورنالاستىرىلدى. ۆيسە-پرەمەر ەۆاكۋاسيالانعان ازاماتتارمەن كەزدەسۋدە مەملەكەت تاراپىنان كورسەتىلەتىن قارجىلىق قولداۋ شارالارىن ەسكە سالدى. ءقازىردىڭ وزىندە 3383 وتباسى 100 اەك كولەمىندە ءبىر رەتتىك جاردەماقى الدى.
سونداي-اق وبلىس تۇرعىندارىنا KAZ Minerals، Kazakhmys Holding جانە Kaspi.kz كومپانيالارى قازاقستاندا سۋ تاسقىنىنان زارداپ شەككەندەرگە 60 ملرد تەڭگەگە دەيىن قاراجات بولگەنى، سونداي-اق قاراجاتتىڭ نەگىزىنەن سولتۇستىك قازاقستان وبلىسىنا باعىتتالاتىنى تۋرالى ايتىلدى.
«مەملەكەت باسشىسىنىڭ تاپسىرماسى بويىنشا مەن ءۇش ءىرى كومپانيانىڭ باسشىلىعىمەن جانە اكسيونەرلەرمەن بىرگە وسى وڭىرگە كەلدىم. جالپى سوماسى 60 ملرد تەڭگە سۋ تاسقىنىنان زارداپ شەككەندەرگە پاتەر ساتىپ الۋعا جانە ءۇي سالۋعا باعىتتالادى»، — دەدى ۆيسە-پرەمەر حالىقپەن كەزدەسۋىندە. سونداي-اق وبلىس اكىمدىگىنە ەكى اپتا ىشىندە تۇرعىن ۇيلەردى باعالاپ، ولاردى قالپىنا كەلتىرۋ جۇمىستارىن باستاۋ تاپسىرىلدى.
«مۇنداي جاعداي ەلىمىزدە ءبىرىنشى رەت ورىن الىپ وتىر. بۇل ناعىز اپات ەكەنىن ءوز كوزىممەن كوردىم. ەشكىم بەيجاي قالماۋى كەرەك. مۇندا ءبارى تەڭ. ۇكىمەتپەن بىرگە قولدان كەلگەننىڭ ءبارىن جاساۋعا تىرىسامىز»، — دەدى Kaspi.kz ديرەكتورلار كەڭەسىنىڭ ءتوراعاسى ۆياچەسلاۆ كيم.
سولنەچنوە-2 اۋىلىندا 100 ءۇيدىڭ قۇرىلىسى باستالىپ كەتتى. وعان 10 مەردىگەرلىك ۇيىم جۇمىلدىرىلدى. جوبا وبلىس اكىمدىگى مەن «قازاقستان حالقىنا» قورى اراسىندا قول قويىلعان مەموراندۋم اياسىندا باستاۋ الدى. باسپانانى جازدىڭ ورتاسىنا دەيىن اياقتاۋعا مۇمكىندىك بەرەتىن قاجەتتى ينجەنەرلىك ينفراقۇرىلىم مەن كوممۋنيكاسيالار بار.
بۇدان كەيىن قانات بوزىمبايەۆ ونەركاسىپ جانە قۇرىلىس ءمينيسترى قانات شارلاپايەۆ پەن مەردىگەرلەردىڭ قاتىسۋىمەن كەڭەس وتكىزدى.
«ونەركاسىپ جانە قۇرىلىس مينيسترىنە ءوڭىردى قاجەتتى قۇرىلىس ماتەريالدارىمەن قامتاماسىز ەتۋدى، ولاردىڭ باعاسىن ۇنەمى قاداعالاپ، قىمباتتاۋىنا جول بەرمەۋدى تاپسىرامىن. ءار تەڭگەگە سۇرانىس بولاتىنىن مەردىگەرلەر مەن اكىمدىككە تاعى دا ەسكە سالامىن. وڭىرلەردى قالپىنا كەلتىرۋ ۇدەرىسىنە قۇقىق قورعاۋ ورگاندارى جۇمىلدىرىلىپ، جاعدايدى مۇقيات قاداعالاپ وتىر. اۋا رايى سالقىنداعانشا زارداپ شەككەندەردىڭ بارلىعىن قونىستاندىرۋىمىز كەرەك»، — دەپ تۇيىندەدى ۆيسە-پرەمەر.