«مەكتەپتەگى شاحمات» جوباسى جۇزەگە اسىرىلىپ جاتىر.
بيىل قازاقستاندا العاش رەت وتەتىن شاحماتتان رەسپۋبليكالىق وليمپيادا وتەدى. وعان 100 مىڭنان استام وقۋشى قاتىسادى. ىرىكتەۋ سايىستارىنا 2-11 سىنىپ وقۋشىلارى قاتىسادى، دەپ حابارلايدى Almaty-akshamy.kz.
وليمپيادا 10 قاڭتاردا قازاقستاننىڭ بارلىق ءوڭىرى مەن مەكتەبىندە باستالادى. وسىنداي ءىس-شارالار ۇيىمداستىرۋ ارقىلى مينيسترلىك ەلىمىزدەگى شاحمات قوزعالىسىنا قولداۋ كورسەتۋدى جوسپارلاپ وتىر.
«پرەزيدەنتتىڭ قولداۋىمەن «مەكتەپتەگى شاحمات» جوباسى جۇزەگە اسىرىلىپ جاتىر. شاحمات فاكۋلتاتيۆ رەتىندە 28 مىڭعا جۋىق بالاعا ارنالعان 654 مەكتەپتە ەنگىزىلدى. سونداي-اق مەكتەپتەردە شاحمات سەكسياسىنىڭ سانى 10 مىڭنان استى. شاحمات قوزعالىسىن ودان ءارى قولداۋ ماقساتىندا بيىل مينيستر اسحات ايماعامبەتوۆتىڭ تاپسىرماسىمەن وقۋشىلار اراسىندا شاحماتتان وليمپيادا وتكىزىلگەلى وتىر. جەڭىمپازدار مەن جۇلدەگەرلەر مەدالدارمەن، كۋبوكتارمەن جانە ديپلومدارمەن ماراپاتتالادى. بۇل وقۋشىلاردىڭ شاحمات قوزعالىسىنا قىزىعۋشىلىعىن وياتۋعا سەپتىگىن تيگىزەدى. بۇل - مەكتەپ، اۋداندىق، قالالىق، وبلىستىق جانە رەسپۋبليكالىق كەزەڭدەردەن تۇراتىن اۋقىمدى تۋرنير. ءار مەكتەپتىڭ قاتىسقانى ماڭىزدى»، – دەيدى ورتا ءبىلىم كوميتەتىنىڭ ءتورايىمى گۇلميرا كارىموۆا.
مەكتەپتەردە اشىلعان سەكسيالاردان بولەك، 60 مىڭ وقۋشى قوسىمشا ءبىلىم بەرۋ ۇيىمدارىنداعى 3،5 مىڭ شاحمات ۇيىرمەسىندە شاحماتپەن اينالىسادى.
بۇعان دەيىن مينيستر اسحات ايماعامبەتوۆ مينيسترلىك پەن شاحمات فەدەراسياسى اراسىنداعى وقۋ-ادىستەمەلىك قۇرالداردى دايىنداۋ، شاحمات تۋرنيرلەرىن وتكىزۋ جانە جاتتىقتىرۋشىلار مەن مۇعالىمدەردىڭ بىلىكتىلىگىن ارتتىرۋ بويىنشا بىرلەسكەن جۇمىسقا قاتىستى كەلىسىمدەر تۋرالى ايتقان بولاتىن.