تۇركىستان وبلىسىنىڭ تۇرعىنى بيىلعى مامىردان بەرى نەسيەسىن تولەمەگەن.
وڭىردەگى پاترۋلدىك پوليسيا باتالونى قىزمەتكەرلەرىنىڭ پلانشەتىنە 10 ملن تەڭگە قارىزى بار Toyota Corolla كولىگى بويىنشا دابىل تۇسكەن، دەپ حابارلايدى aqshamnews.kz Polisia.kz-كە سىلتەمە جاساپ.
اۆتوموبيل سايرام-اقسۋكەنت تاس جولىندا توقتاتىلدى.
كولىكتى ساقتاندىرۋ ءپوليسى بويىنشا ايەل باسقارعان. تەكسەرۋ كەزىندە اۆتوموبيل ونىڭ كۇيەۋىنىڭ اتىنا جازىلعانى بەلگىلى بولدى. الايدا ەر ادامنىڭ بانككە قوماقتى قارىز ەكەنى انىقتالدى. ول مامىردان بەرى قارىزىن تولەمەگەندىكتەن پوليسياعا سوت ورىنداۋشىسىنان قاۋلى تۇسكەن.
"مالىمەتتەر بازاسىن تەكسەرۋ بارىسىندا توقتاتىلعان كولىكتىڭ يەسىندە 10 ملن تەڭگە قارىز بارى انىقتالدى. كولىكتى ارنايى ايىپتۇراققا قويدىق. قارىز وتەلمەيىنشە، سوت ورىنداۋشىنىڭ رۇقساتى كەلمەيىنشە، اۆتوموبيل سول جەردە تۇرادى"، – دەدى وبلىستىق پاترۋلدىك پوليسيا باتالونىنىڭ كومانديرى الماس مىرزاحمەتوۆ.
پوليسيا وبلىس تۇرعىندارىنا بەرەشەكتى ۋاقىتىندا تولەۋگە كەڭەس بەرەدى.