مەملەكەتتىك ارحيۆ: قۇجاتتار سيفرلاندىرىلدى، تەحنيكالىق جابدىقتار جاڭاردى، مامانداردىڭ جالاقىسى ءوستى
تەحنيكالىق تۇرعىدا كۇردەلى جۇمىستى تەز ءارى ساپالى ىسكە اسىرۋ ءۇشىن مەملەكەتتىك مۇراعات ماتەريالدىق-تەحنيكالىق بازانى جاڭارتىپ، قۇجاتتاردى قالپىنا كەلتىرۋ زەرتحاناسىن اشتى. وسى ماقساتتا قالالىق بيۋدجەتتەن سوڭعى 10 جىلدا ءبىرىنشى رەت قارجى ءبولىندى.
وسىلايشا، الماتىنىڭ مەملەكەتتىك ءارحيۆى پلانەتارلىق تيپتەگى كوپفورماتتى جەتى سكانەر، ا3 جانە ا2 فورماتىنداعى كوپ اعىندى جەتى سكانەر، وبەكتىلەردىڭ 3D ينتەراكتيۆتى كەسكىنىن جاساۋعا ارنالعان جۇيە، ميكروفيلمگە ارنالعان COM جۇيەسىن، ميكروفيلم وقۋعا ارنالعان جابدىقتى، كەڭ فورماتتى پلوتتەردى، ەلەكتر گيلوتينىن، قۇجاتتاردى قالپىنا كەلتىرۋگە ارنالعان پرەسس جابدىعىن، جارىق ۇستەلىن، قاعاز جانە پەرگامەنت بەتىندەگى قۇجاتتاردى قالپىنا كەلتىرۋگە ارنالعان مۋلتيفۋنكسيونالدى جابدىقتى، سونداي-اق 110 مونوبلوك پەن 34 كومپيۋتەر ساتىپ الدى.
«قاعاز قۇجاتتاردى سيفرلىق فورماتقا كوشىرۋ – ۋاقىت تالابى. ارحيۆتە قاعاز بەتىندەگى جانە اۋديوۆيزۋالدى قۇجاتتاردى سيفرلاندىرۋ جۇمىسى قارقىندى ءجۇرىپ جاتىر. ونى تەك زاماناۋي ءارى مىقتى تەحنيكانىڭ كومەگىمەن جۇزەگە اسىرۋعا بولادى. سوندىقتان قالا اكىمى ەربولات دوسايەۆ سالا وكىلدەرىنە ۇلكەن قولداۋ كورسەتۋ بويىنشا ءبىرقاتار شەشىم قابىلدادى. ماسەلەن، سوڭعى ەكى جىلدا ارحيۆتەگى ماتەريالدىق-تەحنيكالىق بازا جاڭارىپ، مامانداردىڭ جالاقىسى 30%-عا ءوستى. سونداي-اق مەكەمەدەگى ستاسيونارلىق سورەلەردىڭ ورنىنا ءموبيلدى سورەلەر الىندى. سول ارقىلى قۇجاتتاردى قابىلداۋ جانە ساقتاۋ ورنى كەڭەيدى»، – دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.