ونىڭ ورنىنا قايتادان جاڭا كونسەرت زالىن تۇرعىزۋ جوسپارلانىپ وتىر
پرەزيدەنت تاپسىرماسىنا سايكەس، اتىراۋدا قۇرىلىسى توقتاپ تۇرعان كونسەرت زالى بۇزىلادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
پرەزيدەنت بىلتىر اتىراۋعا كەلگەن ساپارىندا 10 جىل بۇرىن سالىنا باستاعان كونسەرت زالى ءالى پايدالانۋعا بەرىلمەگەنىن سىناعان بولاتىن.
«مەن اتىراۋ قالاسىندا دارىندى جاستار ءۇشىن مادەنيەت جانە شىعارماشىلىق ورتالىعىن سالۋدى تاپسىرامىن. ونى قازاق كۇي ونەرىنىڭ الىبى –قۇرمانعازىنىڭ اتىمەن اتاۋدى ۇسىنامىن. اتىراۋ ءاربىر تۇرعىنعا قولايلى، تازا، زاماناۋي قالاعا اينالۋعا ءتيىس. قالادا كەيبىر نىسانداردىڭ قۇرىلىسى كوپ جىلدان بەرى توقتاپ تۇر. مىسالى، 10 جىل بۇرىن سالىنا باستاعان كونسەرت زالى ءالى پايدالانۋعا بەرىلگەن جوق. ءتىپتى، ونىڭ عيماراتى جارامسىز كۇيگە ءتۇستى. ۇكىمەت اكىمدىكپەن بىرلەسىپ، وسىنداي نىسانداردى سالىپ ءبىتىرۋ ماسەلەسىن ءبىرجولا شەشۋگە ءتيىس. قاجەت بولسا، ينۆەستورلاردى تارتىڭىزدار. حالىق مۇنداي عيماراتتاردىڭ يگىلىگىن كورۋى قاجەت»، - دەگەن ەدى جيىندا قازاقستان پرەزيدەنتى.
ەندى پرەزيدەنت سىنىنا ىلىنگەن كونسەرت زالىنىڭ عيماراتى بۇزىلاتىن بولدى. بۇل نىساننىڭ قۇرىلىسى ون جىلدان بەرى توقتاپ تۇر.
وبلىستىق قۇرىلىس باسقارماسىنىڭ باسشىسى نۇربەرگەن قۇسايىنوۆتىڭ مالىمەتىنشە، كونسەرت زالىنىڭ تەحنيكالىق جاعدايىنا ساراپتاما جۇرگىزىلگەن. ساراپتامانىڭ ناتيجەسىندە مەتالدى جانە تەمىربەتوندى كونسترۋكسيالاردىڭ جارامسىزدىعى تۋرالى قورىتىندى بەرىلگەن.
«كونسەرت زالىنىڭ عيماراتى تولىقتاي بۇزىلادى. ونىڭ ورنىنا قايتادان جاڭا كونسەرت زالى تۇرعىزۋ جوسپارلانىپ وتىر. عيماراتتىڭ جانىنان مۇراجاي سالىنادى. ءقازىر «BI Group» كومپانياسىمەن ەسكيزدىك جوباسى جاسالىپ جاتىر. بارلىعى ارنايى دايىندالىپ جاتقان جوبادان كەيىن بەلگىلى بولادى. نىساننىڭ سول اۋماعى قالا ما، جوق پا، بۇل دا ناقتىلانادى»، - دەپ حابارلادى نۇربەرگەن قۇسايىنوۆ.
ەسكە سالا كەتەلىك، بۇعان دەيىن اتىراۋدا قۇرىلىسى توقتاعان كونسەرت زالىنىڭ ورنىنا مادەنيەت ورتالىعى سالىناتىنىن جازعان ەدىك.