شىمكەنتتىك دارىگەرلەر 10 جاستاعى بالاعا وتا جاسادى.
باس اۋرۋىنا شاعىمدانعان وقۋشىعا "اسار" شاعىناۋدانىنداعى قالالىق بالالار كلينيكالىق اۋرۋحاناسىنىڭ دارىگەرلەرى وتا جاسادى. ناتيجەسىندە ميىنداعى ەحينوكوكك كيستاسىن حيرۋرگيالىق جولمەن الىپ تاستادى، دەپ حابارلايدى Almaty-akshamy.kz Astanatv.kz-كە سىلتەمە جاساپ.
وتا ەكى ساعاتقا سوزىلعان. وتادان كەيىن ناۋقاس بالا ەكى تاۋلىك رەانيماسيادا جاتىپ، كەيىن جالپى پالاتاعا شىعارىلعان. دارىگەرلەر باس ميىنان قۇرت تابىلعان بالانىڭ قازىرگى جاعدايى جاقسى ەكەنىن ايتتى.
«ساۋىردە 10 جاسار بالا قالالىق بالالار كلينيكالىق اۋرۋحاناسىنا ءتۇستى. جوسپارلى تۇردە بالاعا وتا جاسالىپ، قۇرت ءتارىزدى ەحينوكوكك كيستاسى الىندى. بالانىڭ دياگنوزى مرت ارقىلى انىقتالعان. ناۋقاستىڭ باسى اۋىرعان، سول بەلگىلەرى بويىنشا اۋرۋى انىقتالدى»، - دەدى شىمكەنت كلينيكالىق بالالار اۋرۋحاناسىنىڭ دارىگەر-نەيروحيرۋگى سامات كوكشىكبايەۆ.
وتادان كەيىن ءبىر اپتاعا جۋىق اۋرۋحانادا جاتقان ناۋقاستى دارىگەرلەر ۇيىنە شىعاردى. ءقازىر مەكتەپ وقۋشىسى جەرگىلىكتى ەمحاناداعى دارىگەرلەردىڭ باقىلاۋىندا. دارىگەرلەردىڭ سوزىنشە، باس ميىنداعى ەحينوكوكك قۇرتى - سيرەك كەزدەسەتىن جاعداي. كوبىنە مۇنداي قۇرت تارىزدەس كيستا باۋىر مەن وكپەدە كەزدەسەدى ەكەن.