بالانى پەرزەنتحانادان شىعارىپ الۋ دا شوۋعا اينالدى
جۋىردا ماڭعىستاۋ وبلىستىق پەريناتالدىق ورتالىعىنىڭ وكىلدەرى Facebook ارقىلى تۇرعىندارعا توسىن ءوتىنىش جولدادى. ەلدى ەلەڭ ەتكىزگەن ءوتىنىش ءماتىنىن تولىق كەلتىرە كەتەيىك.
«قۇرمەتتى دوستار! قازىرگى كۇنى عيماراتىمىزدىڭ كىرەبەرىسىندە سابيلەردى ۇيگە شىعارۋ شاراسى شوۋعا اينالدى دەسەك بولادى. كۇندە ساعات 14.00-دەن باستاپ جۇمىس اياعىنا دەيىن ورتالىق الدى تويداعىداي ۋ-شۋعا ۇلاسىپ، قىپ-قىزىل بيمەن جالعاسىپ، قىمبات كولىكتەرگە، ءتۇرلى انيماتورلارعا تولىپ كەتىپ، تۋما-تۋىس، دوس-جاران كىشىگىرىم توي جاسايدى. قانشا ەسكەرتسەك تە، قاراپايىم حالىق تا، انيماتورلار دا تۇسىنەر ەمەس، دۋماندى توي كۇندە جالعاسۋدا. تۇرعىندار جاڭا بوسانعان انا مەن ءومىر ەسىگىن اشقانىنا ءبىر جەتى دە تولماعان ءسابيگە ەرەكشە كۇتىم مەن تىنىشتىق كەرەك ەكەنىن بىلە تۇرا، انشىلەردى، انيماتورلاردى جالداپ، درون ۇشىرىپ، ولەڭ ايتىپ، كونسەرت ۇيىمداستىرۋدى ۇيرەنشىكتى ادەتكە اينالدىرىپ وتىر.
اسا قۇرمەتتى جەرلەستەر! ەڭ الدىمەن، ءبىزدىڭ ورتالىق – مەديسينالىق مەكەمە. مۇندا تەك قۋانىش قانا ەمەس، باسقا دا جاعدايلار بولىپ جاتادى. ءبىر انالار ءساءبيىن قۇشاعىنا الىپ قۋانىپ جاتسا، كەيبىرى جانساقتاۋ بولىمىندە ءومىر ءۇشىن كۇرەسۋدە. اسىرەسە، وتە از 500،0–700،0 گر سالماقپەن دۇنيە ەسىگىن اشىپ، 2-3 اي بويىنا ارنايى قۇرىلعىلاردا وڭالتۋدان ءوتىپ جاتقان ءبوبەكتەرگە اسا قاجەتتى تىنىشتىق جاعدايدىڭ بۇزىلۋى. مۋزىكانىڭ ءۇنى داۋىس كۇشەيتكىشى ارقىلى قاتتى شىعادى جانە ول بارلىق بولىمگە انىق ەستىلەدى. شۋلى جاعداي مەديسينا قىزمەتكەرلەرىنىڭ جۇمىستارىنا دا كەدەرگى كەلتىرۋدە. ورتالىق عيماراتى تيپتىك جوبامەن سالىنعان، سابيلەردى شىعارۋعا بولەك، باسقا ورىن قاراستىرۋ مۇمكىندىگى جوق.
ءيا، نارەستەنى ۇيگە شىعارۋ – ۇلكەن قۋانىش! مۇمكىن، زامان تالابى دا شىعار. دەگەنمەن، ءار نارسەنىڭ ورنى، شەگى بولۋى كەرەك. پەرزەنتحانانىڭ الدىندا توي-دۋمان ۇيىمداستىرماي، شىعارۋعا ەكى-ۇش جاقىن ادامى كەلىپ، جىلدىڭ ءتورت مەزگىلىندە بولاتىن ىستىق پەن سۋىقتىڭ، جەلدىڭ جايسىز اسەرىنەن انا مەن بالانى ساقتاپ، امان-ەسەن ۇيىنە جەتكىزىپ، قۋانىشتى ءوز شاڭىراعىڭىزدا تويلاساڭىز، نۇر ۇستىنە نۇر بولار ەدى. ءبىزدىڭ وتىنىشىمىزگە تۇسىنىستىكپەن قارايدى دەگەن سەنىمدەمىز. راحمەت!»، دەلىنگەن جازبادا. استىنا پەرزەنتحانا الدىن باسىپ العان، شار ۇستاعان، كەرنەيلەتكەن، سىرنايلاتقان وتىز-قىرىق شاقتى ادامنىڭ، قاز-قاتار تىزىلگەن سۇلىكتەي قاپ-قارا التى «گەلەندۆاگەننىڭ»، كۇنشۋاقتا سكامەيكادا تىنىعىپ جاتقان انيماتورلاردىڭ سۋرەتتەرىن قوسا جۇكتەپتى.
بۇل جازبانى ەلۋدەن استام ادام ءبولىسىپ، ءقوبى قۇپتاعان پىكىرلەر قالدىرعان. «دۇرىس سولاي بولۋى كەرەك. بىرەۋ بالاسى شەتىنەپ جىلاپ شىعادى. بىرەۋلەردىڭ سول دابىرانى جاساۋعا قالتاسى كوتەرمەيدى. سودان ۇرىس شىعادى. تىيىم سالۋ كەرەك». «قالالىق ماسليحاتپەن بەكىتىپ، تىيىم سالۋ كەرەك، بولدى. باعىنباعاندار ايىپپۇل ارقالاسىن!». «قوشەمەتتى ءوز ۇيىندە، اۋلاسىندا، تويحانادا جاساي بەرۋگە بولادى نەگىزى». «بۇل نە ماقتانگەرلىك؟ داڭعويلىق!». «دۇرىس تاقىرىپ قوزعاپ وتىرسىز. اسىرەسە، بالاسىنان ايىرىلعان انا ءۇشىن، شاراناسى ءومىر ءۇشىن كۇرەسىپ جاتقان انا ءۇشىن وتە اۋىر جاعداي. انا مەن بالانىڭ قىرىق كۇندىك شىلدەسى بار، مۇنداي جيىن-توي ىستەگەنشە، انا مەن بالانىڭ جاعدايىن جاساسىن».
ايتپاقشى، بۇل جازباعا اۆتور دەنساۋلىق مينيسترلىگىمەن بىرگە ءمينيسترىمىزدى دە تەگتەپتى. سوندىقتان بۇل ءوتىنىش جوعارىعا جەتىپ، ءتيىستى شەشىم قابىلداناتىن شىعار.
الماتى دا – ۇلكەن قالا. ەسكەرە ءجۇرەيىك دەگەن وي عوي بىزدىكى...