بۇل تۋرالى وقۋ-اعارتۋ مينيسترلىگىنىڭ باسپا ءسوز قىزمەتى حابارلادى.
قۇجات قابىلداۋ 1 تامىزعا دەيىن جالعاسادى، دەپ حابارلايدى Almaty-akshamy.kz
وقۋ-اعارتۋ مينيسترلىگى ورتا ءبىلىم كوميتەتىنىڭ حابارلاۋىنشا، بۇگىندە 1-سىنىپقا قابىلداۋعا 249 737 ءوتىنىش تۇسكەن. ونىڭ ىشىندە بالالاردىڭ 70%-عا جۋىعى مەملەكەتتىك تىلدە وقىتۋدى تاڭداعان.
"قۇجات قابىلداۋ شتاتتىق رەجيمدە جۇرگىزىلىپ جاتىر. اتا-انالار بەلسەندىلىك تانىتىپ جاتىر. بيىلعى ءبىرىنشى سىنىپقا قابىلدانۋشىلار اراسىندا مەملەكەتتىك تىلدە وقىعىسى كەلەتىندەر كوپ. قازاق تىلىندە وقىتاتىن سىنىپتارعا قابىلداۋ بويىنشا قىزىلوردا (94،1%)، ماڭعىستاۋ (93،2%)، ۇلىتاۋ (82،5%)، تۇركىستان (80،6%) جانە جامبىل (79،4%) وبلىستارى ەڭ جوعارى كورسەتكىشپەن الدا تۇر"، – دەدى كوميتەت ءتوراعاسىنىڭ ورىنباسارى جومارت قارامبايەۆ.
1-سىنىپقا قابىلداۋ بويىنشا وتىنىمدەردىڭ جوعارى كورسەتكىشتەرى دە قىزىلوردا (92%)، ۇلىتاۋ (83،7%)، شىعىس قازاقستان (78%)، ماڭعىستاۋ (87،1%) تۇركىستان (79،8%) وبلىستارىندا بايقالادى.
حالىققا ىڭعايلى بولۋ ءۇشىن قۇجاتتاردى قابىلداۋ مەملەكەتتىك قىزمەتى تولىعىمەن اۆتوماتتاندىرىلعان. 1-سىنىپقا قابىلداۋ ەgov.kz ەلەكتروندى ۇكىمەت ۆەب-پورتالى ارقىلى جۇزەگە اسىرىلادى. 1-سىنىپقا بالالار 6 جاستان باستاپ اتا-اناسىنىڭ نەمەسە بالانىڭ زاڭدى وكىلىنىڭ ءوتىنىشى نەگىزىندە قابىلدانادى. سونىمەن قاتار دەنساۋلىق جاعدايى تۋرالى قۇجاتتار (026/ۋ-3 نىسانى جانە 065/ۋ) جانە 3ح4 ولشەمدى 2 فوتو قوسا بەرىلەدى. الدىن الا بولجام بويىنشا، جاڭا وقۋ جىلىندا 410 مىڭنان استام بالا 1-سىنىپقا بارادى.